बजेट पास जुइगु प्रमया दावी
'कांग्रेसीत तम्वःसां सरकार क्वःदली मखु'
येँ (सन्ध्या टाइम्स)/प्रधानमन्त्री माधव नेपालं माओवादीत सहमतिइ वइगु विश्वास प्वंकुसें क्वःछिनातःगु इलय् हे बजेट पारित जुइ धयादीगु दु ।
मध्य व सुदूरपश्चिमया खुसिबाः व चलखं प्रभावित लागा चाःहिलेगु झ्वलय् थौं सुथय् सुर्खेत विमानस्थलय् सञ्चारकर्मित लिसे खँ ल्हासें वय्कलं उगु खँ धयादीगु खः।
'बजेट पारित मजुयाः सरकारं राष्ट्रया धुकुतिं ध्यबा छ्यले मफइगु व माआवादीयात पनाः बजेट पारित यायेमाःगु अवस्था वइ मखु' वय्कलं धयादिल ।
छगू न्ह्यसःया लिसः बिसें प्रम नेपालं सुजातायात उपप्रधानमन्त्री नियुक्त यानागु कारणं सरकारयात गुगुं नं कथंया लिच्वः मलाइगु खँ नं धयादिल ।
पत्रकारत लिसे खँ ल्हायेगु झ्वलय् वय्कलं सुदूरपश्चिम व मध्य पश्चिमया खुसिबाः व चलखं पीडिततय् निंतिं सरकारं विशेष राहत प्याकेज हयेगु जानकारी नं बियादिल। लिसें वय्कलं गृह मन्त्रालयपाखें तत्काल खाद्यान्नया व्यवस्था यायेगु बचं नं बियादिल ।
उगु हे ज्याझ्वलय् अर्थमन्त्री सुरेन्द्र पाण्डें खुसिबाः व चलखं पीडिततय् निंतिं सरकारं १८ करोड तका दां निकासा यायेधुनागु जानकारी बियादिल ।
सुर्खेत विमानस्थलय् वःपिं सरकारी कार्यालयया प्रमुखतय्त नखःया इलय् सुनां नं खाद्यान्न अभाव फये म्वाःलेमा धइगु निर्देशन नं प्रम नेपालं बियादीगु दु। खुसिबालं पीडिततय् निंतिं स्वच्छ नसा व स्वच्छ लःया व्यवस्था यायेत नं वय्कलं निर्देशन बियादिल ।
नेपाली सेनाया हेलिकप्टरं झाःम्ह प्रम नेपाललिसे कांग्रेसया कार्यवाहक सभापति सुशील कोइराला नं दीगु खः।
प्रमं थौं हे अछाम, बझाङ, डडेलधुरा, कैलाली, बर्दिया व बाँकेया भ्रमण नं यानादी ।
प्रम सुर्खेत थ्यनेवं माओवादी कार्यकर्तातय्सं वय्कःयात हाकुगु ध्वाँय् क्यनाः विरोध प्वंकूगु खः ।
उखे एमालेया अध्यक्ष झलनाथ खनालं नं सुजातायात उपप्रधानमन्त्री दयेके धुंकाः कांग्रेसय् खने दुगु असन्तुष्टिपाखें सरकारयात लिच्वः मलाइगु खँ धयादीगु दु। एमाले म्याग्दीपाखें बेनीइ ग्वसाः ग्वःगु पत्रकार सम्मेलनय् न्ववासें वय्कलं उगु खँ धयादीगु खः ।
'सरकार समर्थक २२ दल दथुइ एकता कायम जुयाच्वंगुलिं सरकारयात छुं हे लिच्वः लाइ मखु' अध्यक्ष खनालं धयादिल।
थ्वहे असोज महिनाया दुने नं यदि बजेट संसदय् न्ह्यब्वयाः पारित याये मफुत धाःसा देश गम्भीर समस्याय् लाः वनीगु खँ नं वय्कलं धयादीगु दु ।
