छि ला अबु थें हे का ... ...

नर्मदेश्वर प्रधान

उबलय्। स्वनिगलय्। उलि सफू पसःत मदुनि। रत्नपुस्तक। नांजाःगु सफू पसः। विद्यार्थी। साहित्यकार। सकसियां सफू न्यायेगु पसः। सफू न्यायेमाली। ध्यबा माली। बाःयात धाये। ध्यबा बिउ बिउ बा नं धाइ - 'रत्न भाइ दाइ, जिगु नां का, गाक्क छूट दइ।' सफू न्याःवनेगु खँ वइ। बा नं थ्व हे खँ लिसा काइ। पसलय् वने। रत्न दाइ दइ। गय् धायेगु छूटया खँ। धाये ला मधाये ला। मछाः थें। मछिं थें च्वनी। गबलें धाये। बिचाः याना बी। गबलें धायेमास्ते वइ मखु। धाये मखु। म्हुतुं हे पिहां वइ मखु। छेँय् वने। बा नं वहे खँ न्यनी - ''छूट गुलि बिल?'' छूट बिउगु खँ कने। बा लय्ताइ। गर्व याइ। धाइ - 'रत्न भाइ मचांनिसें म्हसिउम्ह।' गबलें छूट मकाये। बाः नं न्यनी। जि कात्तुमत्तु काइ। जिं न्वंमवाःसे च्वने। बाः नं खँ थुइकी। तं चाइ। 'जिगु नां काये छाय् थाकु चाःगु? रत्न भाइ थः हे मनू, वं झीत स्वइ। मिखा तिसिना छूट बी।' मतिइ मतिइ धाये। आपा न्यायेबलय् ला खः का, छगू निगू न्यायेबलय् छु हालाः च्वनेगु? छूट धकाः। बा नं धाःसां हालाच्वने मास्ते वइ मखु। छेँय् वये। बाया ब्वः तःक्वः फये नं ।

जयराम साहु। माडवाडी। न्हूसतकय् कापः पसः। मचाबलय् जिमि बालिसे पिहां वये। न्हूसतकय् यनी। बा व पसलय् छकः दुहां वनी। फय् तुइ। जयराम साहुं लसकुस याइ। मास्टर साहेब। झासँ। दिसँ। हनाबना तइ। मोहनि, स्वन्ति। ततापिं पसः वनी। वसः, सारी न्यायेत। बा नं धाइ। जयरामथाय् हुँ। व झी मनू। वं झीत क्वाइ मखु। जिगु नां का। बा नं अक्सर फलफूल न्हुछेचिथाय् न्याइ। लं नातिचिथाय् सुइकी। अथे हे जाकिबजि। चन्द्रमानथाय् न्याइ। चन्द्रमान। जिमि बाया मचाबलय्या पासा। जिमि बा नं आखः ब्वन। मास्टर जुल। चन्द्रमानया आखः ब्वनेगु त्वःफित। साहु जुल। जाकिबजि साहु। बानं न्ह्याबलें धाइ। चन्द्रमानचा व जि। मचाबलय् गुच्चा म्हिता च्वनागु। वं झीत मभिंगु बी मखु। वयाथाय् भाः मनासिब जुइ। नाप लात कि चन्द्रमानं धयाच्वनी। मास्टर साहेब। बांलाःगु जाकि वयाच्वंगु दु। बानं चन्द्रमान लुमंकी। मांयात धयाच्वनी। जाकिबजि ला चन्द्रमानचिथाय् कायेमाः। बाया निर्देशन जुइ। फलफूलया खँ वइ। बानं न्हुछेथाय् घ्वाइ। वसः सुइकेगु खँ वइ नातिचिथाय छ्वइ। मांनं छकः निकः बायात धाइ। मस्तय् स्वया याइनि। छि छाय् कपाः स्याकेगु। थौंकन्हय् न्हू न्हूगु पसःत वये धुंकल। जयरामथाय् उलि बांलाःगु कापः हे मदु। छि थः मनू धयां छु याये। जाकिबजिया खँ कयाः नं। मांनं बायात न्वानाच्वंगु ताः। मचां निसेंया पासा धयां छु याये। चन्द्रमान साहु। उखुन्हु बिया हःगु जाकि न्यालुसे च्वं। मस्त फुक्क हाल। ध्यबा निगः पाः याःगु स्वयां जी ला। माल गति लाःसा खः। पासां धयां जक जी ला। चन्द्रमानचां झीत अथे गबलें याइ मखु। बानं जिद्दी याइ। बानं सिउ। चन्द्रमानं बायात मेपिंत स्वयां निर्का प्यर्का दंक बी। थुकी शंका याये
थाय् मदु। बा न्ह्याबलें धुक्क ।

झीत थुमिसं ठगे याइ मखु। रत्नभाइ। चन्द्रमान। न्हूछे। नाति। इत्यादि। सन्दर्भ कथं बानं उमित लुमंकी। उपिं प्रति थःगु विश्वास प्वंकी। 'छिकपिनिगु पालय् थें खः ला। ई पाये धुंकल। निगः प्यंगःया लागिं छु हालाच्वने यइ। थौंकन्हय्या मस्त। गुलि न्हू न्हूगु पसः वये धुंकल। मस्तय्सं थः थः स्वया याइ नि। त्वःताः बिउसां जिउ नि। छाय् अन हुँ। थन हुँ धया च्वनादियागु। निगः प्यंगः ध्यबाया लागिं।' जिमिगुपाखें मांनं इलय्ब्यलय वकालत याइ। बानं लिसः बी - 'निगः प्यंगः धइगु ध्यबा हे मखु ला ?'

जिमि ककाया काय। जिपिं स्वया थँ। मचाबलय् दुःख वया। निथाय् प्यथाय् ज्या याइ। आर्थिक अवस्था सुथां लाकी। कमे याइ। गुलि जक नुगः स्याःगु व। न्ह्याबलें वहे चाइनिज कापः लाकां छजु। बांलाःगु लाकां ला न्ह्यायेमाः। गुलि कञ्जुस व। वं न्ह्याना तइगु लाकां खनी। मतिं मतिं जिं कुंखिने ।

व रामदाइ स्वले। आः ला उमेर नं दये धुंकल। मफय् धुंकल। पसः वयाच्वनी सुथय् सुथय्। अज्याःगु हूलय्। दइ धकाः ग्याः। रामदाइ जिमि पाजुया काय। तताजुयात धइगु नं खः। रामदाइ मफये धुंकल। पसः वयाच्वनी। मस्तय्त ज्या वाःसां जिउ नि। तताजु हीचाइ। धाइ। गन मस्तय्त पत्याः याइ। थः हे वयेमाः। मस्तयसं भाः याये मसः हँ। धाक्व पुली हँ। तताजुया खँ न्यने। खँ थुइ। निगः प्यंगः धइगु ध्यबा मखु ला। रामदाइ नं नं धया च्वं थें ताइ ।

जि उबलय् नकतिनिया ल्याय्म्ह। जिमि बा नं रत्नभाइ। चन्द्रमान। नातिचिया खँ ल्हाइबलय् यक्व उसि चाये नं। हिचाय् नं। ध्यबा निगः दनाः छु याये। नातिचां सुइगु पाइन्ट वहे खः। भ्याः छाँट मवं। बानं मसीक बाःया उजं जिं उल्लंघन याये नं। चन्द्रमानथाय् मवंसे जुजुमान थाय वने। निर्का अप्वः पुले। बांलाःगु बजि कया हये। जमाना पायेधुंकल। बाया ई मखये धुंकल। पुलांगु चलन। बिचाः। ज्या लगे जुइ मखु। मतिइ मतिइ बालिसे असन्तोष प्वंके नं। ख्वख्वःमख्वः धाये नं ।

थौं जि नं उमेर वनी। उबलेया बाया उमेर थौं जिगु जुइ। जिगु जहानं दः तक्वः धाये धुंकल। लाकां छजु न्यानादिसँ। मोहनि, स्वन्ति वल। भ्वय् सिजन वइ। अज्याःगु लाकां न्ह्याना च्वनादिल। 'छुं हे मजू नि। छकः सुइके। रोगन तयेके। अझ खुला प्यला ज्या बी तिनि।' जिं धाये। जिं लाकां मन्याना। ज्या बितले छाय् वांछ्वयेगु। जहानयात धयाच्वने। मस्त गुलि हाले धुंकल। बायात पाइन्ट निगः सुइका बिउ धकाः। न्ह्याबलें। न्ह्याथाय् नं वहे निगः पाइन्ट न्ह्याना जुइ। जहानं तं प्वंकी। गबलें जिं ताःसू याये मखु। गबलें धाये। जिगु पाइन्त छुं मजू नि। अझ निदँ प्यदँ ज्या बी तिनि। छाय् वांछ्वयेगु। छुं मजूगु वांछ्वये। न्हूगु न्याये। छाय् ध्यबा फुकेगु ।

घडी ई स्वयेत खः। जितः प्लाष्टिकया घडी तसकं यः। जिगु घडी। जिगु छ्यया घडी। ज्वःलाः। थिकेगु न्ह्यानाः छु याये? घडी आखिर ई स्वयेत खः। 'प्लाष्टिकया घडी न्ह्याना दीमते। मचात तंचाल। भ्वय् वनेबलय् ला मेगु न्ह्यानादिसँ।' कलातं क्वाइ। जिं कलाःयात हायेके। 'जि जुजुमान। प्लाष्टिकया घडी न्ह्याःसां जुजुमान। थिकेगु न्ह्याःसां जुजुमान। पाइगु छु।' 'खः खः जुजुमान छि। मनूत गनया गन थ्यने धुंकल। गज्याः गज्याःगु नये, तिइ, पुनी। छि धाःसा वहे क्वपुलांगु बिचाः। निर्गिचा।' मस्तय्सं पिनेया नसा न्याना हइ। जिं धाये। छेँय् हे दयेकूसा जिउ नि। ताजा जुइ। ध्यबा नं कतिलाइ। पसः वने। मतिइ लुइ। छाय् थिकेगु कमिज न्यायेगु। उलि हे ध्यबां निपाः न्याये। चाइनिज कापःया लाकां न्याये। बिचाः याये। थ्वं नं ला ज्या बी नि। उमेर वं लिसे बायात म्हसिया वइ। ककाया काय। पाजुया काय। फुकसित थुया वइ। 'बाबु जिगु नां का। रत्नभाइ नं स्वयाः बी।' बाया थ्व धापूया अर्थ थौं थुइ। बांलाक थुइ। 'छि ला धात्थें अबु थें जुया वल का। पहचह। खँ। फुक्क हूबहू। उथें।' कलातं दः थौंकन्हय् धयाच्वनी। कलाःया खँ न्यने। मां लुमनी। मांनं बायात धयाच्वनी। जिं ताः। 'अबु थें हे छि। छुं हे मपाः। गुलि हाले फुगु। गुलि ... ... गुलि ... ... गुलि... ...।'

narapradhan@yahoo.com

More Stories Like this