नेपाल संवत् ११३० तःजिक हनेगु तयारी
झी नेपाःमितय् मौलिक संवत् नेपाल संवत् ११३०या न्हूदँ तःजिक हनेगु निंतिं यक्व हे खलः पुचःत पाखें थीथी ज्याझ्वः याइगु जूगु दु ।
नेपाल भाषा मंकाः खलया ग्वासालय् वंगू मंगलवाः जूगु छगू मुँज्यां थुगुसीया न्हूदँ तःजिक हनेगु निंतिं सभासद् तीर्थराम डंगोलया नेतृत्वय् न्हूदँ समारोह समिति - ११३० नीस्वंगु दु । समितिया पुलांपिं नाय्त लक्ष्मण राजवंशी, डा. रत्नकमल वैद्य, आर. के. मानन्धर व सुरेन्द्रवीर मालाकारयात हनेबहपिं दुजः कथं ल्यःगु दुसाः समितिय दुजःय् एकाराम सिंह, चन्द्रमान मुनिकार, सानुराजा शाक्य, विजयबहादुर माली, प्रा. भिमसेनदास प्रधान, शरद कसाः, रज्जु रञ्जितकार व कस्तुरी श्रेष्ठयात ल्यःगु दु ।
न्हुदँ समारोह समितिया ग्वसाःलय् कछलथ्व पारु न्हूदँ कुन्हु न्ह्यावलें थें बसन्तपुली तःजिगु सांस्कृतिक र्याली व समारोह जुइगु जूगु दु । उगु सभाय् सम्मानीय प्रधानमन्त्री माधवकुमार नेपाल मूपहाँया कथं झायादी ।
थुगुसी बसन्पुली जुइगु न्हूदँया समारोहयात न्हापा लिपाथें प्रधानमन्त्रीया भाषण लिपाः क्वमचायेकूसें न्हिछि हे ज्याझ्वः याइगु जूगु दु । स्थानीय सिन्हःस्वां खलया संयोजनय् अन न्हिछिन्यंक सांगीतिक ज्याझ्वः जुइगु नापं सफू, म्येचा न्याये-मीगु ज्या नं जुइ ।
अथेहे न्हूदँ समारोह समितिया ग्वसालय् लक्ष्मीपुजाया सनिलय् येँ क्यान्डल वाक जुइगु ज्याझवः दुसाः वहे न्हि कुन्हु लियो क्लब यलया ग्वसालय् यलया मंगलं नं क्यान्डल वाक जुइगु जूगु दु ।
न्हूदँया लसताय् नेवाः देय् गुथि नेपालमण्डलया ग्वासालय् ११२९ कौलागा चःर्हे कुन्हु येँया बसन्तपूली निसें यलया मंगलय् तक वाकाथोन ज्याझ्वः जुइत्यंगु दु । अथेहे न्हू पुचः भिंद्यःत्वाःया ग्वसालय् लक्ष्मीपुजा कुन्हु सुथय् बसन्तपूली झिंस्वक्वःगु मचाब्वाज्या कासाः जुइत्यंगु दु ।
न्ह्यावलं थें थुगुसी नं येँ दुने व येँ पिने पाखें माटोर साइकल र्याली जुइगु ज्याझ्वः दुसाः थुगुसी नेवाः जागरण मञ्चया कवः नेवाः जागरण व्यापारी मञ्चया ग्वसालय् कार र्याली नं याइगु जूगु दु । मञ्चं न्हूदँ ११३०या कछलागा ५ कुन्हु उगु र्याली यायेगु ज्याझ्वः दयेकातःगु दु ।
नेपाल संवत न्हूदँ ११३० व स्वन्तिया लसताय् मांभाय् धुकू एन्ड ससुद्यः प्रोडक्सनया ग्वसाःलय् कैउलागा द्वादशि निसें खिचापुजा तक स्वन्हुन्यकं यलया भाष्कारवर्ण महाविहारय् सफू व म्येँचाः ब्वज्या यायेत्यंगु दु ।
अथेहे नेपाल संवत् हनेगु निंतिं स्वनिगलं पिनेया नं थीथी खल पुचतय्सं न्हूदँ समारोह समिति नीस्वनाः सांस्कृतिक ज्याझ्वः, मोटरसाइकल र्याली, तुच्चाः नापं नेपाल संवत्या महत्व बारे गैर नेवाःतय् दथुइ नं प्रचार प्रसार यायेगु थीथी ज्याझ्वःत सार्वजनिक याःगु दु ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
