स्वन्ति लिपा माओवादी सरकार
थ्व सरकार क्वःदलीगु बाबुरामया दावी
येँ (सन्ध्या टाइम्स)/स्वन्ति क्वचायेवं माओवादीया नेतृत्वय् राष्ट्रिय सरकार गठन जुइगु खँ एकीकृत नेकपा (माओवादी)या उपाध्यक्ष डा. बाबुराम भट्टराईनं धयादीगु दु।
नियमित ज्याझ्वः कथं थःगु गृह जिल्ला थ्यंम्ह डा. भट्टराईनं थौं सुथय् गोरखा अस्पताल परिसरय् जनस्वास्थ्य सहकारी संस्था लिमिटेडं चायेकूगु फार्मेसीया उलेज्या यासें वय्कलं उगु खँ धयादीगु खः ।
न्ह्यानाच्वंगु राजनीतिक गतिरोध याकनं हे अन्त्य जुइ धासें वय्कलं वार्ता व सहमतिया आधारय् माओवादीया नेतृत्वय् राष्ट्रिय सरकार नीस्वनीगु दाबी यानादीगु खः ।
'वर्तमान कठपुतली सरकारं याकनं हे बिदा काइ,' वय्कलं धयादिल। थ्व सरकार दयाच्वंतले संविधान नं दयेके मफइगु व शान्ति प्रक्रिया नं धरापय् लाइगु बिचाः नं वय्कलं प्वंकादिल ।
भट्टराईनं राष्ट्रिय सरकारया विकल्प मदु धासें स्वन्ति लिपा हे थःगु पार्टीया नेतृत्वय् सरकार दयेके मफुत धाःसा जनता सतकय् कुहां वइगु ख्याच्वः नं बियादिल ।
'स्वन्ति लिपा नं सहमति कायम जुइ मफुत धाःसा आन्दोलनया धाकु फय् वइ,' वय्कलं धयादिल। उगु आन्दोलनं जनतां हे थ्व सरकारयात बलजफ्तिं चीका छ्वइगु दावी नं यानादिल ।
भाजु भट्टराई चुनाव ताकाय् बिउगु बचं कथं लय् छक्वः थःगु गृह जिल्ला गोर्खा वनेगु यानाच्वंगु दु ।
उखे एमाले महासचिव ईश्वर पोखरेलं माओवादीया कारणं संविधान च्वयेगु ज्याय् पंगः ब्वलनाच्वंगु द्वपं बियादीगु दु। थौं सुथय् प्रेस चौतारी ख्वपं ग्वसाः ग्वःगु भिंतुना कौला ज्याझ्वलय् न्ववासें वय्कलं उगु खँ धयादीगु खः।
माओवादी गतिविधिया कारणं शान्ति प्रक्रिया, सेना समायोजन व संविधान दयेकेगु ज्याय् समस्या जुयाच्वंगु खँ नं वय्कलं कनादिल ।
छुं राजनीतिक नेतातय्सं प्वंकूगु अभिव्यक्तिया कारणं संविधान च्वयेगु प्रक्रियाय् तकं लिच्वः लानाच्वंगु खँ नं वय्कलं धयादीगु दु ।
थ्वहे झ्वलय् कांग्रेस व एमालें तयार याःगु मंकाः संकल्पयात कयाः माओवादी व एमालेया दथुइ सहलह जूगु दु। माओवादी संसदीय ज्याकू सिंहदरबारय् च्वंगु बैठकय् कांग्रेस व एमालें तयार याःगु संकल्पय् माओवादीया असहमति न्ह्यब्वःगु खः।
बैठकय् माओवादीं नं थःपिंसं तयार यानातःगु संकल्प प्रस्ताव उगु बैठकय् न्ह्यब्वःगु खँ धाःगु दु ।
थुकिया बारे थौं एमालें कांग्रेस लिसे नं सहलह यायेगु तयारी यानाच्वंगु दु। संकल्प प्रस्तावय् मुख्य रुपं राष्ट्रपतिया पलाःयात कयाः गय् यानाः संवोधन यायेगु धइगु विषयय् विवाद जुयाच्वंगु दु ।
