चीनलिसे माओवादीया स्वापू

देशय् माओवादीया सरकार वयेसातकि चीनया गतिविधि अप्वया वल धकाः तायेका हःगु खःसा मेगु जःलाखःला देय् भारतं ला आपत्ति क्यनेगु ज्या तकं याना हःगु खः ।

तत्कालिन प्रधानमन्त्री प्रचण्ड भारत सिबें न्ह्यः चीनया भ्रमणय् वनेवं भारतया आक्रोश झन् हे अप्वःगु खः। प्रचण्डं अबलय् प्रधानमन्त्रीया रुपय् भारतया औपचारिक भ्रमण ला यानादिल तर चीनया औपचारिक भ्रमण धाःसा याये मखं। सम्भवतः अबलय् यायेमखंगु ज्या पूवंकेगु लागिं आः प्रधानमन्त्री मखुसां नं चीनया भ्रमण शुरु यानादीगु दु।
नेपालय् सत्ताय् च्वनाः नं भारत सिबें चीनपाखे अप्वः 'टिल्ट' जूगु शक्ति जुजु धुंकाः सम्भवतः माओवादी हे जुइमाः। माओवादीया जनयुद्ध कालय् हे आपालं चिनियाँ अधिकारीतय्सं नेपाः भ्रमण यानाः माओवादी नेतातय्त गोप्य रुपं नापलाःगु खःसा माओवादी सरकारय् वयेधुंकाः ला झण्डै नेपाः-चीन शान्ति मैत्री सम्बन्धी न्हूगु सन्धि हे जुइत्यंगु खः। गुलिस्यां थुकियात माओवादीं म्हितेत स्वःगु 'चाइना कार्ड' धकाः नं व्याख्या यातसा गुलिस्यां जुजु विरुद्ध भारतयात प्रयोग यायेधुंकाः आः भारत विरुद्ध चीनयात प्रयोग याःगु धकाः नं विश्लेषण याना हल। अप्वःसिया धापू धाःसा नेपालय् एकछत्र कायम जुयाच्वंगु भारतीय दबदबायात क्वपालेत प्रचण्डं ल्ह्वंगु पलाः खः थ्व।
थौंया विश्वं भारत व चीन निगुलिं देय्यात भविष्यया शक्ति राष्ट्र कथं खंकाच्वंगु दु। थज्याःगु निगू देय्या दथुइ च्वंगु नेपालं थ्व इलय् अतिकं संवेदनशील जुयाः थःगु परराष्ट्र नीति न्ह्याकेमाःगु आवश्यकता दु। चीनलिसे सतीपिं व भारतलिसे सतीपिं धयातःगु पार्टीत छथाय् च्वनाः संयुक्त नीति निर्माण यायेमाःगु खनेदु ।

More Stories Like this