भैरब जात्रा

बलामी राज पुण्यसरु

चित्लाङ्गया माझ गाउँ धाःथाय् दँय्दसं न्यायेकीगु भैरब जात्रा थुगुसी नं तःजिक न्यायेकल। मोहनि सिधयेवं थ्व जात्रा शुरु जुइ। अले स्वन्ति सिधयेवं क्वचाइ। मोहनि व स्वन्तिया दथुइ जात्रा न्यायेकेगु हे थुकिया विशेषता खः। कतिं पुन्हिया छन्हु न्ह्यःया चान्हंनिसें थ्व जात्रा न्ह्याइ।
जात्रा शुरु यायेत कतिं पुन्हि छन्हु न्ह्यःया चान्हय् मूल गुथियारया छेँय् तयातःगु द्यःया खःयात समाः यासें बाजं थानाः भैरबया देगलय् यंकी। खः यात्रा याये न्ह्यः द्यःयात देगलय् तान्त्रिक विधिपाखें पञ्चबली बी। पञ्चबली बीगु ज्या स्थानीय द्यःलातय्सं याइ ।

वयां कन्हय् कुन्हु अर्थात कतिं पुन्हि कुन्हु खःयात माझ गाउँन्यंकं हे बाजं थानाः चाःहीकी। खः चाःहीकाः छेँखा छेँखां पुजा नं फइ ।

खः जात्रा क्वचायेवं स्वनिगःया यलय् थें थन नं कात्तिप्याखं क्यनेगु शुरु जुइ। कात्तिप्याखं दँय्दसं क्यनेगु ज्या ला जुइ तर गुदँय् छक्वः धाःसा न्यान्हु तक कात्तिप्याखं क्यनेगु ज्या जुइ। अथे गुदँय् छक्वः क्यनीगु पाः थुगुसी लानाच्वंगु दु। तर कात्ति प्याखं लगातार हे न्यान्हुयंकं क्यनीगु धाःसा मखु। दथु दथुइ छुं न्हि दिनाः प्याखं क्यनी। अय् जुयाः थुगु दँया कात्तिप्याखं जारी हे जुयाच्वंगु दु। स्थानीय प्याखं ग्वसाः खलकं जानकारी बिउ कथं थ्वहे वइगु कार्तिक ५ गते तक थ्व प्याखं क्यनी तिनि ।

चित्लाङ्गया माझ गाउँ धाःगु थ्व थासय् कात्तिप्याखं क्यनेगु चलन मल्ल जुजु योग नरेन्द्र मल्लया पालंनिसें हे शुरु जूगु अनुमान दु। कात्तिप्याखं मुलतः यलया प्याखं खः। मल्ल कालय् पालुङ्ग, तिष्टुङ्ग, चित्लाङ्ग आदि लागा यलया शासन दुने लाः। उकिं यलया हे संस्कृति थन नं चले यानाच्वंगु खनेदु। कात्तिप्याखं मल्लकालीन खःसां भैरबनाथया खः जात्रा धाःसा लिपा शाहकालय् जुजु सुरेन्द्र वीर विक्रमया पालंनिसें हे शुरु जूगु खनेदु। जुजु सुरेन्द्रया पालय् भैरब गुथिया नामय् लालमोहर याना बीवं तिनि थ्व जात्रा शुरु जूगु ऐतिहासिक प्रमाण दु। भैरव गुथिया सञ्चालक भाजु सालिकराम मानन्धरयाके थ्व लालमोहरया प्रमाण आः तकं दनि ।

More Stories Like this