माओवादी तुच्चां निकास पिकाइ
मतभेद थाति तयाः प्रचण्ड चीनपाखे
येँ (सन्ध्या टाइम्स)/वइगु कार्तिक ३ गते एकीकृत नेकपा (माओवादीं) ग्वसाः ग्वयेत्यंगु तुच्चा ज्याझ्वलय् राजनीतिक निकास पिहां वइगु खँ माओवादी अध्यक्ष पुष्पकमल दाहाल 'प्रचण्डं' धयादीगु दु ।
थौं सुथय् चीन भ्रमण वने न्ह्यः अन्तर्राष्ट्रिय विमानस्थलय् पत्रकारत लिसे खँ ल्हायेगु झ्वलय् वय्कलं उगु खँ धयादीगु खः ।
थः चीन भ्रमणं लिहां वयेवं हे राजनीतिक निकास पिहां वइगु खँ धासें वय्कलं राजनीतिक निकास पिकायेत माओवादीं कांग्रेस व एमालें दयेकूगु प्रस्तावयात संशोधन यानाः न्हूगु प्रस्ताव हयेत्यनागु जानकारी नं बियादिल ।
स्वंगू राजनीतिक पार्टीया दथुइ सलहल न्ह्यानाच्वंगुलिं राजनीतिक गतिरोधया निकास पिहां वइगु खँय् थः आशावादी जुयाच्वनागु खँ नं पत्रकारत लिसे खँ ल्हायेगु झ्वलय् वय्कलं कनादिल ।
देय्या राजनीतिक स्थिति संवेदनशील जुयाच्वंगु खँ कनादिसें वय्कलं उकी पत्रकारत गम्भीर जुइमाःगु खँ नं धयादीगु दु।
पत्रकारतलिसे खँ ल्हायेगु झ्वलय् वय्कलं थःगु चीन भ्रमण राष्ट्रिय हितयात ध्यानय् तयाः यायेत्यनागु मैत्रीपूर्ण भ्रमण जूगुलिं भ्रमणयात कयाः निगू देय् दथुया स्वापुती लिच्वः लाइ कथंया संवेदनशील विषययात तमच्वयेकेत नं पत्रकारतय्त इनाप यानादिल ।
चिनियाँ कम्युनिष्ट पार्टीया ब्वनाय् माओवादी अध्यक्ष प्रचण्ड, उपाध्यक्ष मोहन बैद्य (किरण), विदेश विभाग प्रमुख कृष्णबहादुर महरा व प्रचण्डया काय प्रकाश दाहाल छवाःयंकंया भ्रमणया निंतिं थौं सुथय् चीनपाखे वंगु खः।
भ्रमण पुचलं चिनियाँ राष्ट्रपति हु जिन्ताओ लगायत चीनया उच्चस्तरीय नेतात नापलानाः आपसी स्वापू व सैद्धान्तिक विषयय् सहलह याइगु खँ धाःगु दु ।
माओवादी नेता महरां बियादीगु जानकारी कथं निगू पार्टीया उच्च तहया वार्ताया झ्वलय् निगुलिं पार्टीं नाला वयाच्वंगु सिद्धान्तया बारे नं समीक्षा जुइ ।
'निगू कम्युनिष्ट पार्टी दथुइ सैद्धान्तिक विषयय सहलह यायेगु झ्वलय् उकिया समीक्षा जुइ' महरां धयादिल, 'तर आः हे उकिया विस्तृत एजेन्डा धाःसा तयार मजूनि।' अध्यक्ष प्रचण्डं उकुन्हु तिनि चीन शासित हंगकंग भ्रमण यानादीगु खः ।
थ्वहे झ्वलय् थौं राजनीतिक गतिरोधया बारे सहलह यायेगु निंतिं एमाले, कांग्रेस व माओवादीया नेतातय् दथुइ बैठक च्वनेगु तयारी जुयाच्वंगु दु। माओवादी संसदीय दलया ज्याकू सिंहदरवारय् थ्व बैठक च्वनेगु तयारी जुयाच्वंगु खँ सम्बन्धित सूत्रं धाःगु दु ।
