राष्ट्रपति ओबामायात नोवेल सिरपाः

अमेरिकी राष्ट्रपति बाराक ओबामायात थुगु दँया नोवेल शान्ति सिरपाः बीगु धकाः याःगु घोषणां विश्वयात चकित याना बिउगु दु। राष्ट्रपति जूगु हे नकतिनि गुला तिनि दुम्ह भाजु ओबामां कुर्सीइ फ्यतुनाः आः तक छुं ज्या हे याये लाःगु मखुनि। अज्याःम्ह मनूयात छकलं नोवेल सिरपाः बीगु धकाः याःगु थ्व घोषणायात विज्ञतय्सं 'याकनं जूगु' ज्या धकाः टिप्पणी याःगु दु ।

थ्व वास्तवय् नोवेल कमिटीपाखें राष्ट्रपति ओबामां याःगु ज्यायात च्वछायेगु ल्याखं सिबें नं वय्कलं विश्व शान्तिया लागिं याये धकाः प्वंकादीगु प्रतिवद्धतायात पूवंकेत अभिप्रेरित यायेगु ल्याखं सिरपाः बिउगु खनेदु। नोवेल कमिटीं गबलें गबलें थज्याःगु ज्या नं याः। राष्ट्रपति ओबामां राष्ट्रपतिया कार्यभार लःल्हायेवं हे अरब विश्वलिसे ल्वानाः मखु मिले जुयाः न्ह्याः वनेगु धकाः घोषणा यानादीगु खः। लिसें वय्कलं अमेरिकां दुश्मन धकाः तायेकातःगु देय्त इरान व उ. कोरिया लिसे नं मिले जुयाः न्ह्याः वनेगु नीति दयेकादीगु खः। थ्वहे झ्वलय् वय्कलं उकुन्हु राष्ट्र संघया महासभाय् न्ववासें परमाणु ल्वाभः दयेके मते धकाः मेपिं देय्त जक धायेगु मखु कि परमाणु ल्वाभः दुपिं देतय्सं नं उकिया भण्डार क्वपाला यंकेगुपाखे पलाः न्ह्याकेमाल धकाः आह्वान यानादीगु खः। वय्कःया थ्व बिचाः धाथें नं विश्वय् शान्ति कायम यायेत मजिमगाः। वय्कलं थ्व गुगु घोषणा यानादिल उकियात थःगु कार्यकालय् धाथें व्यवहारय् नं यानाः क्यनेत प्रेरणा वयेमा धकाः हे थ्व सिरपाःया घोषणा जूगु खयेफु। थुकिं राष्ट्रपति ओबामायात थम्हं यानागु घोषणा इमान्दारीपूर्वक लागू यायेत नैतिक दवाव नं लाइगु निश्चित दु ।

More Stories Like this