निहुँ खोजे याःगु खःला कि ?

अनाम

जि निम्ह छय् दु। छम्ह निदँ फुनाः स्वदँ क्यंम्ह। छम्ह च्यादँ फुनाः गुदँ क्यंम्ह। दाजुम्ह ब्यागलं छगू खातय् द्यनिसा किजाम्ह माम्ह नापं। छन्हु किजाम्हं दाजुम्हेसिया खाताय् दाजुम्ह थें तुं याकःचा द्यनेमाल धकाः निहु माल। दाजुम्ह नापं नापं द्यः धालं माने मजू। हानं दाजुम्हेसित मेथाय् द्यं धालं नं माने मजू। अले मांम्ह तं पिकया निम्हेसित छथु निथुं मुइकल। चीधिकम्हेसित छघौ मयाक ख्वयेका तल नं माने मजू। सुनां ह्ययेका ह्ययेके मफु। आखिरय् दाजुम्हेसित सम्झे बुझे यानाः ह्ययेकाः मेथाय् थ्यनेमाल। किजाम्ह वहे खाताय् याकःचा द्यनाः त्वःतल। अथे द्यनाः तिनि न्ह्यः वयेकल ।

थ्व सन्दर्भ थन जिं छाय् न्ह्यथनां च्वनागु धाःसा थौंकन्हय् थ्व देया तःधं धाःपिं नेतातय्सं नं थथे हे निहु मालाच्वंगु दु। जिद्दी यानाच्वंगु दु। जिमि च्यादँ दुम्ह छय् ला सम्झे बुझे यानाः मिले जुइगु लागि क्वमिलु जुया माने जुल, किजायात थाय् त्वःताः बिल। तर थनच्वपिं सःसिउ धाःपि भेटरान भेटरान राजनीतिज्ञ धाःपिं राजनीतिइ ससं सँ तुइधुंकूपिं देश नयाः शेष जुइ धुकूपिं नेतातय्त छाय् सुनां सम्झे बुझे याना मिले याये मफुगु? सम्झे बुझे यात नं छाय् मथुगु? छाय् मिले मजूगु ?

थन थौं श्रावण २३ गते निसें थौंतक नागरिक सर्वोच्चताया निहुँ मालाः माओवादी संसद न्ह्याके मबिसे बन्द यानातःगु दु। अले मेमेगु ततःधंगु पार्टी धाःपिसं नं विकल्प बियाः माओवादी याःगु संसद बन्द चायेकेफु नं सम्झे बुझे याना मिले जुइफु। संसद थथे हे बन्द जुयाच्वन धाःसा थन देय् हे बन्द जुइत ताउ माली मखु। स्वम्ह तःधंपिं नेतात गिरिजा, माधव व प्रचण्डपिंस छु थथे हे उमिगु बिचाः कथं सम्झे जूगु खःला कि? देय्यात। उमि मयेकं यमि चित्त बुझे मजुइकं थ्व देशय् मेपि सुनां नं छु याये फइ मखु धकाः फुइँ यानाच्वंगु खःला कि? यदि उमिगु थ्वहे फुइँ नं यानाः जि मदयेक वा जिपिं मदयेकं थ्व देशय् सं छपु नं संके फइ मखु धकाः अड्डी कयाच्वंगु खःसा वा शत्रु पार्टी धकाः उमिगु छ्यं क्वःछुकेगुया निंतिं 'इगो' ज्वनाच्वंगु खःसा उमित नेपाली जनताया खबरदारी दु। होस याः न्हां होस याः, यदि उमिगु पहः थ्व हे जुयाच्वन धाःसा, इलय् संविधान दयेके मफुत, संघीय राज्य स्थापना जुइ मफुत धाःसा आन्दोलन १ आन्दोलन २ या इलय् दनावःपिं जनतात हाकनं दनाः नेतातय् छेँय् छेँय् पार्टी पार्टीया अफिसय् वया बदला काः वइ तिनि। होस याः यदि अथे जुल धाःसा न्हापा थें अज्याःपिं नेतात भारतय् जक मखु संसारया गनं देशय् बिसिउँ वंसां बचे जुइ मखु। गन गन देशय् नेपालीत दु उपि सकसिनं उमित त्वःती मखु। नेतातय् भरौटेत भातृ पार्टीत धाःपिं सुनां नं उमित सुरक्षा याये फइ मखु। नं प्रहरी याये फइ नं सैनिकं। सकलें व इलय् आम जनता जुया बी। आम जनता विरुद्ध सुं नं दना वइ मखु। सुनां नं प्रतिकार याइ मखु ।

थौंकन्हय् ६०१ सभासदत दु। उमिस लय् लय् म्हती नं पीन्यादँ निसें न्यय्द्वः ध्यबा नयाच्वंगु दु। व ध्यबा न उमि अबुया संपत्ति खः नं उमि माया क्वसः खः। व ला शोषित पीडित जनतां पुलातःगु करया ध्यबा खः। लय् लय् उलिमछि जनताया ध्यबा नयाः नं जनतया ज्या याये धकाः च्वनाच्वंपि सभासदतय्सं थौं लां लां संसद बन्द यानाः छु हे ज्या मयासे ध्यबा नयेबलय् भचा हे मछाः मजू ला? जनताया चि नयाः च्वंसेलिं चिया ज्या याये म्वाःला? यदि स्वयागु चिया सोझो मयात धाःसा व चि मजुसे लिपा वनाः छन्हु विष जुइ। होस या। जनताया ध्यबा नयाः जनताया ज्या मयाःसें थःथः ल्वानाः, थःथःगु जिद्दी ज्वनाः, इगो ज्वनाः, जनताया छ्यंनय् मुस्या सियाः जुइगु ज्या ताः तक जुयाच्वन धाःसा जनता उकिया बदला काइतिनि। पलेसा काइतिनि। थौं स्वंगू पार्टी गुगु थःथःगु अडान ज्वनाः देय्यात न्ह्यज्याके मबिउसे दिकातल। उमिगु अजाःगु अडान सुयागु ठिक खः, सुयागु बेठिक खः धइगु नं जनतां बांलाक सिउ। सर्वसाधारण जनता गुपि छुं नं पार्टीया कार्यकर्ता मखु, न्हप्यं मखु, सेवक मखु, उमिस सिउनि थन भिम्ह सु मभिंम्ह सु धकाः। थःथःगु पार्टी व भातृ पार्टीया मनूत मुंकाः वं वयात वं वयात ल्वाकाः, तोडफोड यानाः अप्पां ल्वहँतं कयेकाः सनां जुया छु उपिं गबलें नापं च्वने म्वाःल ला? गबलें ख्वाः स्वये म्वाःल ला? अथे थःथः शत्रुता यानाः जुयाः उमिगु दथुइ मित्रता दःसां व मित्रता दुनेनिसे नुगलं निसेंया जुइ ला? सं वाःगु थलया भू तनां वनी ला ?

छखे सरकारय् च्वंपिं पार्टीतय्सं थ्व सरकार संविधान दयेकेगु ज्या क्वचायेकाः चुनाव सिमधःतले क्वःदली मखु धकाः धयाजुइगु। मेखे माओवादी नेतात धाःसा आः याकनं मोहनि धुंकाः सरकार क्वःदली अले माओवादीया राष्ट्रिय सरकार दयेके धकाः धाइगु। अले थन सर्वसाधारण जनता सुयागु खँ न्यनेगु? स्वयात विश्वास यायेगु? यदि थन राष्ट्रिय सरकार दयेकेगु सकसिया मनसुवा खःसा न्ह्याम्हेसिया सरकार जूसा दयेके जिउ नि। छाय् ल्वापु? फलानाया सरकार छाय्? यदि संविधान दयेका हानं चुनाव मजुतले सकलें पार्टीत मिले जुयाः देश व जनताया लागिं सर्वदलीय राष्ट्रिय सरकार दयेकाः ज्यायात धाःसा गथे न्हापा माओवादी लिसे १२ बुँदे सम्झौता यानाः माओवादीत संघर्ष त्वःताः खुला राजनीति वल। सकलें जनता लय् ताल, सकसिनं सुवा बिल, अथे हे थौं नं पार्टीत मिले जुयाः ज्यायात धाःसा जनता खुसि जुइ। लय्ताइ सुवा बी। संविधान दयेकाः लिपा जुइगु चुनावया लिच्वः हे महत्वपूर्ण जुइगु खःसा थौं थ्व दछि निदँया लागि दयेकीगु सरकारय् वनेत थपाय्सकं छाय् हानथाप? यदि लोभ लालच हे जक खःसा भिं जुइ मखु।
न्हापा माओवादी स्वयम थःगु सरकारय् नेपाली कांग्रेसयात सरकारय् हयाः राष्ट्रिय सरकार दयेके मफु धाःसा आः हानं फइ धइगु गथे याना विश्वास यायेगु? हान माओवादी थःगु सरकार बाहेक मेपिंसं दयेकीगु सरकारयात मान्यता हे बी मखु धकाः जिद्दी याना च्वनेगु खःसा, अले थन सर्वदलीय सरकार सुनां दयेकीगु ले? राष्ट्रिय सरकार दयेकेगु सुत्र छु ले? स्वयागु सरकार वल कि राष्ट्रिय सरकार दयेके फइ ले? भ्रमय् मलाः ला जनता? तःधंगु पार्टीं सकसिनं छप्वाः म्हुतु धाये माल थुकथं राष्ट्रिय सरकार दइ धकाः। मखु धइगु खःसा म्हुतुइ व थें म्हुतु वाना जुइपिं पार्टीयात गथे याना विश्वास यायेगु? नेतात होस या न्हि होस या। गनं भविष्यय् जनताया प्रकोप भागिदार जक जुइ म्वाःलेमा। जिमि चीधिकः म्ह छयय् थें जिद्दीवाल जुइगु मखु तःधिक म्ह छ्यय् थे समझदार जुइगु, थौंया आवश्यकता खः ।

More Stories Like this