सेक्सी जातीय स्वशासन

जातीय स्वशासन थौं नेपाःया निंतिं तसकं सेक्सी विषय जुयाच्वंगु खनेदु । थुकिया नां काल कि हे मनूतय् न्हाय्पं तिंस्वाये धुंकी । सेक्सी विषय जूगुलिं हे जुइमाः थुकिया बारे मनूतय् धापू नं फरक फरक खनेदु । गुलिस्यां धाइ वाह ! जातीय स्वशासन गुलि बांलाः भाइ । अथे हे गुलिस्यां धाइ जातीय स्वशासन ओहो थ्व ला थी हे मज्यू न्हां !

सेक्स नं थथे हे मखु ला, गुलिस्यां सेक्स नां कायेसातकि हे नुगः याऊसे च्वंकी । गुलिस्यां सेक्स धायेसातिक न्हाय् कय्कुंकी । जातीय स्वशासन व सेक्स छुं हे मपाः । अय् जूगुलिं थ्वयात सेक्सी विषय धयागु ।

सेक्स धइगु गय् जुइ धायेबलय् उकियात पूरा छ्यांग जुइक क्यनाबिल धाःसा व बांलाइ मखु । भचा भचा यानाः क्यन धाःसा आकर्षक जुइ । अले मनूतय् ध्यान नं सालाकाइ । जातीय स्वशासनं नं थौंकन्हय् अथे हे यानाच्वंगु दु । थ्वयात सेक्सी विषय धकाः थूपिंसं थुकिया छकू निकू झलक क्यनाः जनजातितय्त आकर्षित यानाच्वंगु दु । छकू निकू हे जक क्यनीगु खःसां गुलिस्यां अप्वः क्यनाच्वंगु दुसा गुलिस्यां कम क्यनाच्वंगु दु । माओवादीं भचा अप्वः हे क्यनाच्वंगु दु एमालें भचा कम क्यनाच्वंगु दु ।

नेपाली कांग्रेसय् सेक्स प्रित रुची है मदयेधुंकूपिं बुरात अप्वः दुगुलिं ला मस्यू उमिसं धाःसा थुकियात 'टाबु' विषय हे दयेकातःगु दनि थुकिया ला नां हे कायेमज्यू धाइगु । कांग्रेसया लागिं जातीय स्वशासन धइगु आः तक नं अश्लील हे विषय जुयाच्वन तिनि । ल्याय्म्हतय् ल्हातय् पार्टीया नेतृत्व मवःतले थ्व अश्लीलता कायम हे जुयाच्वनी तिनि जुइ । तर थौंया जमाना एक्सपोजरया खः । छिं गुलि अप्वः ब्वयेफइ उलि हे पपुलर जुइ । अश्लील धकाः लिकुनाच्वन धाःसा ल्यूने लाइ । सेक्सी विषय जूसां जातीय स्वशासनयात माओवादीं अप्वः एक्स्पोज यात उकिं उपिं जनजातिया प्रिय जुल । मयाःपिं प्रिय मजुल । आखिर युग कथं न्ह्याये ला सयेके हे माः ।

More Stories Like this