ओबामायात नोबेल शान्ति सिरपा:

थुगुसीया नोबेल शान्ति सिरपा: अमेरिकी राष्ट्रपति बाराक ओबामायात बीगु निर्णण छनौट समितिं घोषणा याःगु दु ।

राष्ट्रपति ओवामां शान्तिया निंतिं कुटनीतिक कुतः याःगु व बालांगु भविष्य प्रति आशा क्यनेगु ज्या याःगुलिं वयेकयात सिरपा: बित्यंगु खँ समितिं धाःगु दु । समितिं अन्तर्राष्ट्रिय स्तरय् शान्ति स्थापनार्थ कुटनीतिक कुतयात ओवामां विशेष गति ब्यूगु कारणं वयेकयात २००९या शान्ति पाखेया नोबेल सिरपा: बीगू खँ धाःगु दु ।

शान्ति व मानवता नाप सम्बन्धित अन्तर्राष्ट्रिय संगठनतय्त बल्लकेगु व परमाणु अप्रसारयात बः ब्यूगुलिं नं ओवामायात सिरपा बीगू निर्णय याःगु खँ समितिं धाःगु दु । ओवामाया परमाणु ल्वाभः बिनाया संसारया परिकल्पना नं सिरपा: त्याकेगुया कारण कथं न्ह्यथंनातःगु दु ।

अथेहे थुगुसी रसायनशास्त्र पाखेया नोबेल सिरपा: भारतीय मूलया वेंकटरमण रमाकृष्ण, अमेरिकी थोमस स्टीज व इजरायली अदा योनाथं प्राप्त याःगु दु । थुगु सिरपा: रिबोसमया संरचनाय् याःगु अनुसन्धानया निंतिं प्रदान याःगु ख: ।

थुगुसीया भौतिकशास्त्र पाखेया नोबेल सिरपाः चीनय् बुया बेलायतय् च्वनावयाच्वंम्ह चर्ल्स काओ, अमेरिकी विलार्ड बोयल व जर्ज स्मिथयात ब्यूगु दु । फाइबर अप्टिक केवल विकास यायेत याःगु योगदानया कदर यासें थुगु सिरपा: काओयात प्रदान याःगु खँ रोयल स्वीडिस एकेडेमी अफ साइन्सं धाःगु दुसाः चार्ज कपल्ड डिभाइस (सिसिडी) आविस्कार याःगुलिं थुगु सिरपा: अमेरिकी बोयल व स्मिथयात ब्यूगु खँ धाःगु दु ।

अथेहे थुगुसिया चिकित्साशास्त्र पाखेया नोबेल सिरपा: स्वम्ह अमरिकी अनुसन्धानकर्तात एजिबेथ ब्ल्याकबर्न, कारोल ग्रेइदर व ज्याक स्जोस्टकं प्राप्त या:गु दु । जैविक कोडया निंतिं महत्वपूर्ण क्रोमोजोम्स हाउजिङयात शरीरं संरक्षण याइ धकाः लुइकूगु वाति उमित थुगु सिरपा: लःल्हाःगु खः ।

More Stories Like this