राजा शाक्यया 'बुंगाः' पिदन

नेपालभाषाया नांजाःम्ह बाखं च्वमि राजा शाक्यया न्यागूगु बाखं सफू 'बुंगाः' थौं छगू ज्याझ्वःया दथुइ पितब्वज्या जूगु दु । बाखं दबूया ग्वसालय् जूगु उगु ज्याझ्वलय् नेपालभाषा एकेदमिया चान्सलर नापं 'बाखं दबू'या ज्याथःम्ह सल्लाहकार भाजु सत्यमोहन जोशीया ल्हातिं उगु बाखं सफूया उलेज्या जूगु खः । सफूया उलेज्या यानादिसें वयेकलं बाखं हरेक मनूया जिन्दगीनाप चायेकं मचाय्कं स्वापू दयाच्वनीगु खःसा झीगु बाखं साहित्य न्हापां निसें हे दुगुया दसि धोंचोलेचाया बाखं आदियात कायेफुसा बाखं साहित्यया विकासया बारे कनादीगु खः ।

अथेहे थुग हिराचिनी पुं गुथिया नेपालभाषाया समालोचक सह प्रा. पुष्प बहादुर चित्रकारं नेपालय् नेवाःत राजनैतिक, आर्थिक हरेक कथं विस्थापित जुजुं वनाच्वंगुलिं थुकियात वाः चायेकेमाःगु खँ न्ह्यथनादिसें राजनैतिक रुपं तक्व मछि हे ह्यूपाः वःसा नं नेवाःतय्गु निंतिं छुं उपलब्धिपूर्ण मजूगु खँ धयादिल । वयेकलं थुकिया निंतिं नेवाःत सचेत जुयाः न्ह्याःवनेमाःगु खँ धयादिल । साहित्य, संस्कृति भाषा व जातिया स्वापू दयाच्वनीगुलिं नं साहित्य विकासया निंतिं झीसं ग्वाहाली यायेमाःगु बिचा: वयेकलं प्वंकादिल ।

बाखं दबूया नायः नापं ज्याझ्वःया सभापति साहित्यकार लक्ष्मण राजबंशीं नेपालभाषाया साहित्य बुलुहुं बुलुहुं न्हनावनाच्वंगु खँ धयादिल । वयकलं धयादिल - 'ग्वदँया दुने नेपालभाषाया छगू नाटक पिहां वयाच्वंगु दु', अथेहे वयकलं नेपालभाषाया उपन्यास बाखंत पिहांवयेगु नं म्हो जुजुं वनाच्वंगु खँ धयादिल ।

बाखं च्वमि राजा शाक्यं न्हूबाखं सफू 'बुंगाः'या 'लोडसेडिंग' बाखं ब्वना न्यंकूगु उगु ज्याझ्वलय् प्रा. नर्मदेश्वर प्रधानं लसकुस यानादीगु खः । थुगु बाखं सफू हिराचिनी पुं गुथिपाखें पिथंगु खः ।

More Stories Like this