पोखराय् थौं नं तःधंक ल्वापु
प्रमयात हाकुगु ध्वाँय् क्यं वःपिंत लाठीचार्ज
येँ (सन्ध्या टाइम्स)/पोखराय् जुयाच्वंगु छगू ज्याझ्वलय् ब्वति कायेत उखे झाःम्ह प्रधानमन्त्री माधव नेपालयात थौं एकीकृत नेकपा (माओवादी) या कार्यकर्तातय्सं हाकुगु ध्वाँय् क्यंबलय् प्रहरी व माओवादी कार्यकर्ता दथुइ ल्वापु जूगु दु।
उगु ल्वापुइ लानाः छुं कार्यकर्ता घाःपाः जूगु दु ।
पोखराय् उच्चमावि शिक्षक एसोसियसन नेपालया स्वक्वःगु
राष्ट्रिय महाधिवेशनया उलेज्याया निंतिं पोखरा झाःम्ह प्रधानमन्त्री नेपालयात महाधिवेशनस्थल पोखरा सभागृह वनेगु झ्वलय् सभागृह चोकय् हे माओवादी कार्यकर्तातय्सं हाकुगु ध्वाँय् क्यंगु खः। माओवादीतय्सं ध्वाँय् क्यनेवं हे उकी प्रहरीं हस्तक्षेप याःगु खःसा वयां लिपा निगू पुचः दथुइ अप्पां कयेकाः ल्वापु जूगु खः ।
प्रधानमन्त्रीयात हाकुगु ध्वाँय् क्यँसें पुत्ला च्याकेत स्वयाच्वंपिं माओवादी कार्यकर्तातय्त प्रहरीं संयम जुइत आग्रह याःगु खः। तर कार्यकर्तातय्सं अटेर जुयाः ज्याझ्वः न्ह्याकेत्यंबलय् थःपिंसं लाठी चार्ज यायेमाःगु खँ प्रहरीं धाःगु दु। प्रहरीं लाठी चार्ज यायेवं उकिया लिसलय् माओवादी कार्यकर्तातय्सं अप्पां कयेकूगु खः ।
प्रधानमन्त्री नेपालया सुरक्षाया निंतिं न्यागू घेरा दयेकाः प्रहरीं सुरक्षा बिउगु खः। उगु लँपुइ वनीगु सम्पूर्ण यातायात नं प्रहरीं बन्द याना बिउगु दु। नगर सुनसान जुयाः स्थिति तनावग्रस्त जुया वनेवं अनया फुक्कं पसःत नं तकं बन्द यायेगु शुरु याना हःगु दु ।
थ्व समाचार च्वयाच्वनागु इलय् तक अन प्रहरी व माओवादी कार्यकर्ता दथुइ झडप जारी हे जुयाच्वंगु दनि।
प्रधानमन्त्री नेपाल पोखरा झाइबलय् माओवादी कार्यकर्तातय्सं अवरोध याये फइगु खँयात ध्यानय् तयाः अन प्रहरीं सुरक्षा व्यवस्था कडा यानातःगु खः। थनिं निन्हु न्ह्यः नं प्रम नेपाल पोखरा विश्वविद्यालयया ज्याझ्वलय् ब्वति कायेत पोखरा झाःगु खःसा उगु इलय् सुरक्षा व्यवस्था कडा यानातःगुलिं माओवादी कार्यकर्तातय्सं अवरोध याये मफुगु खःसा राष्ट्रपति नं अन छगू सम्मेलनय् ब्वति कायेत वंगु इलय् द्वःछि स्वयां अप्वः प्रहरी परिचालन याःगु खः।
छुं न्हि न्ह्यः प्रम नेपाल विराटनगर झाःबलय् अन नं वय्कःयात माओवादीतय्सं हाकुगु ध्वाँय् क्यंगु खःसा अबलय् जूगु ल्वापुइ माओवादी कार्यकर्तातय्सं ग्वलंग्वः सरकारी गाडी तोडफोड यासें हिंसात्मक ढंगं प्रदर्शन याःगुलिं थौं पोखरावासीत नं त्रसित जूगु खः ।
थःगु पोखरा भ्रमणया झ्वलय् प्रम नेपालं पार्टीया कार्यकर्ता व
सुरक्षा निकायया प्रमुखतय्त माःगु निर्देशन बियादीगु ज्याझ्वः दु ।
