रक्षा मन्त्रीया बेमौसमी राग

झिदँ ताःहाकःगु जनयुद्ध दिकाः नकतिनि शुरु जूगु शान्ति प्रक्रियायात गय् यानाः पूवंकेगु धकाः चिन्ता जुयाच्वंगु इलय् लाक्क रक्षा मन्त्री विद्या भण्डारीं तत्कालिन सरकार व माओवादी विद्रोही दथुइ जूगु वृहत् शान्ति सम्झौता हे पुनरावलोकन यायेमाःगु प्रस्ताव न्ह्यःने हयाः बेमौसमी राग शुरु यानादीगु दु। जुइधुंकूगु सम्झौता हे इलय् पूवंके फइ लाकि मफइ धकाः वहस जुयाच्वंगु इलय् वय्कलं उगु सम्झौताया पुनरावलोकन यायेमाःगु प्रस्ताव हयाः आः तक जूगु शान्ति प्रक्रियाया सम्पूर्ण ज्याखँयात हे ध्वस्त यायेत्यंगु खने दत। सरकारय् दुथ्याःगु फुक्क पार्टीया वरिष्ठ नेतात व विद्रोही नेतात समेत च्वनाः बल्लबल्ल तयार याःगु उगु सम्झौतायात आः वयाः छम्ह रक्षा मन्त्रीं हीकेमाल धकाः प्रस्ताव तयेगु छगू ला स्वयम्य् हे हास्यास्पद खँ खः। मेगु, थ्व प्रस्ताव कथं यदि धाथें शान्ति सम्झौताया पुनरावलोकन जुल धाःसा देशय् न्ह्यानाच्वंगु शान्ति प्रक्रिया गन थ्यनी व न्हूगु संविधान च्वयेगु ज्याया छु हविगत जुइ, थुकिया वय्कलं गबलें अनुमान याःगु दुला थें? बल्लबल्ल जूगु शान्ति सम्झौतायात पुनरावलोकन यायेगु धइगु बन्द जुयाच्वंगु 'पाण्डोराया बाकस' चायेके थें खः, गुगु चालेसातकि मेगु अनेक समस्यात पिहां वयाः मू खँ हे छखे लाः वनी ।

थौंया इलय् वयाः रक्षा मन्त्रीयात अज्याःगु प्रस्ताव सुनां तयेके बिल खः, व धाःसा सीके हे माःगु रहस्य जुया बिउगु दु। थ्व रक्षा मन्त्रालयं तयार जुया वःगु प्रस्ताव थें खने मदु। वास्तवय् देशय् न्ह्यानाच्वंगु शान्ति प्रक्रियायात अवरुद्ध यायेगु लागिं गज्याःगज्याःगु चाल जुयाच्वंगु दु धइगु खँ मन्त्री भण्डारीपाखें वःगु प्रस्तावं नं क्यनाच्वंगु दु ।

More Stories Like this