हत्याया आरोपी हिरासतय् सीवं स्वम्ह प्रहरी ज्वन
हत्याया द्वपनय् ज्वना हयातःम्ह छम्ह अभियुक्तयात हिरासतय् चरम यातना बियाः स्याःगु द्वपं बियाः सिराहाया स्वम्ह प्रहरीयात अञ्चल प्रहरी कार्यालय राजविराजं थःपिनिगु नियन्त्रणय् काःगु दु । स्थानीय चन्द्रकुमार यादवयात वंगु असोज २८ गते एमाले कार्यकर्ता उतिम महतोयात स्याःगु द्वपनय् वंगु असोज २८ गते सिराहा प्रहरी ज्वनायंकूगु खः । यादव हिरासतय् हे सीवं अञ्चल प्रहरीं छानविनया निंतिं ड्युटी च्वनाच्वंपिं स्वम्ह प्रहरीयात ज्वंगु खः ।
उगु हत्या काण्डया छानवीन यायेत अंचल प्रहरी कार्यालय राजविराजया वरिष्ठ प्रहरी उपरिक्षक श्यामबहादुर खड्काया नेतृत्वय् वंगु पुचलं ड्युटी च्वनाच्वंपिं प्रहरी नायव निरीक्षक रामबहादुर ढकाल प्रहरी हवल्दार हरिशंकर यादव व प्रहरी जवान सुरेन्द्रप्रसाद चौधरीयात थौं सुथय् हिरासतय् कयाः अनुसन्धानया निंतिं अंचल प्रहरी कार्यालय राजविराज यंकूगु दु ।
चन्द्रकुमार यादवयात हिरासतय् हे स्याःगु द्वपं यादवया छेँजःपिंसं बियाच्वंगु दु । अथेहे थुकिया विरोधय् मधेशी जनअधिकार फोरमं थीथी विरोधया ज्याझ्वः याःगु खः । यादव गुकथं सीत धइगु खँ आः तक नं सार्वजनिक मयाःनिसां प्रहरीं आकाझाकां बेहोस जुयाः यादव सीगु धयाच्वंगु दु ।
मेखे असार २८ गते नेपालगाजया सशस्त्र प्रहरी गणय् जूगु विद्रोह संलग्न दुगु द्वपनय् वं भाद्र १६ गतेनिसें दांगया तुलसीपुर कारागारय् तयातःपिं सशस्त्र प्रहरी जवानतय्सं थिनंनिसें आमरण अनशन शुरु याःगु दु ।
आमरण अनशन याये न्ह्यः प्रहरी जवानतय्सं वंगु कार्तिक १ गते स्वंगू बुँदे माग पत्र न्ह्यब्वयाः रिले अनशन शुरु याःगु खःसा म्हिगः बहनी तकं सरकारं थःपिनिगु मागयात कयाः चिउताः मतःगु धासें थिनंनिसें आमरण अनशन शुरु याःगु खः ।
अनसनकारीतय्सं थःपिनिगु मुद्दा खारेज यानाः हाकनं जागिरय् छ्वयेमाःगु प्रहरी जवानय् आत्मसम्मानया रक्षा यायेमाःगु प्रहरी ऐन २०१२ खारेज यायेमाःगु व प्रहरी जवानतय्त जुयाच्वंगु अर्मयादित ज्या दिकेमाःगु माग यानाच्वंगु दु ।
