थौं स्वम्ह नेताया बैठक
मंकाः संकल्प प्रस्तावया मस्यौदाय् सहलह
येँ (सन्ध्या टाइम्स)/न्ह्यानाच्वंगु राजनीतिक गतिरोध अन्त्य यायेगु निंतिं थौं स्वंगू तःधंगु दलया शीर्ष नेतातय् दथुइ बैठक च्वनेगु तयारी जुयाच्वंगु दु ।
बैठकया तयारी जुयाच्वंगु जानकारी सम्बन्धित राजनीतिक पार्टीया नेतातय्सं बिउसां नं ई व थाय् धाःसा क्वःमजिउनिगु खँ धाःगु दु ।
मंकाः संकल्प प्रस्तावय् सहमति दयेकेत थौं शीर्ष नेतातय् दुथइ बैठक च्वनेत्यंगु खँ एमालेया मुख्य सचेतक भीमप्रसाद आचार्यं कनादीगु दु ।
राजनीतिक गतिरोध बारे थौं सुथय् एमाले अध्यक्ष झलनाथ खनाल व प्रधानमन्त्री माधव नेपालया दथुइ नं सहलह जूगु दु ।
प्रधानमन्त्री निवास बालुवाटारय् जूगु उगु सहलहया झ्वलय् माओवादीं तयार याःगु मंकाः संकल्प प्रस्तावया मस्यौदा, कांग्रेस व एमालें तयार याःगु मंकाः सहमतिया प्रस्ताव बारे सहमति मालेमाःगु खँय् निम्ह नेतात सहमत जूगु खँ बालुवाटार स्रोतं धाःगु दु ।
अथे हे सहलहया झ्वलय् लिपांगु इलय् जुयाच्वंगु राजनीतिक विकासक्रम, सरकार परिवर्तन बारे पिने जुयाच्वंगु हल्ला व पार्टी दुनेया असन्तुष्टियात कयाः नं निम्ह नेताया दथुइ सहलह जूगु खँ धाःगु दु ।
बैठकय् थौं च्वनीगु शीर्ष नेतातय् मंकाः बैठकया एजेन्डा बारे नं सहलह जूगु खँ धाःगु दु ।
कांग्रेस व एमाले दुथ्याःगु कार्यदलं तयार याःगु मंकाः प्रस्तावयात माओवादीं अस्वीकार यायेवं राजनीतिक गतिरोध तच्वया वंगु खः ।
माओवादीं मंकाः संकल्प प्रस्तावय् असन्तुष्टि प्वंकेधुंकाः माओवादी थम्हं हे प्रस्ताव तयार याःगु खः। थौं उकियात हे कयाः स्वंगू दलया शीर्ष नेतातय् दथुइ सहलह जुइगु खँ धाःगु दु ।
तर माओवादी व कांग्रेसं राष्ट्रपतिया बारे थःपिनि अडान कायम हे यानातःगु कारणं थौंया वार्ताय् नं निष्कर्ष पिहां वइगु सम्भावना धाःसा म्हो जक दुगु खँ सम्बन्धित सूत्रं धाःगु दु ।
प्रधानसेनापति प्रकरणय् राष्ट्रपतिं ल्ह्वंगु पलाः गलत खः धइगु खँ संकल्प प्रस्तावय् उल्लेख यायेमाःगु माग माओवादीं तयाच्वंगु दुसा एमाले व कांग्रेसं धाःसा राष्ट्रपतिया पलाःयात कयाः संकल्प प्रस्तावय् छुं हे खँ न्ह्यमथनेगु अडान कया वयाच्वंगु खः ।
थ्वहे झ्वलय् व्यवस्थापिका सदनया बैठक थौं नं च्वनीगु जूगु दु। तर थौंया बैठक नं न्ह्याके फइगु सम्भावना धाःसा मदुनि। म्हिगःया सदन बैठक नं माओवादीं अवरुद्ध याःगु कारणं न्ह्याके मफुगु खः। बैठक न्ह्याके मफुत धाःसा बजेट अवरुद्ध जुइगु खतरा वयाच्वंगु दु ।
