आन्दोलन विरोधीया छेँय् नेतातय् मुँज्या

जनआन्दोलन ब्व-२ दबे यायेगु ज्याय् विशेष भूमिका दुम्ह धकाः कृष्णजंग रायमाझी आयोगं किटान यानातःम्ह पुलांम्ह मुख्य सचिव लोकमानसिंह कार्कीया छेँय् वनाः राजनीतिक पार्टीया शीर्षस्थ नेतातय्सं याःगु वार्ता जनताया दथुइ तसकं अलोकप्रिय जुयाच्वंगु दु। थःपिंसं न्ह्याकागु आन्दोलन दबे यायेत जिक्व कुतः याःम्ह मनूया छेँय् वनाः शीर्ष नेतातय्सं वार्ता याः वनेगु धाथें नं आपत्तिजनक खँ खः।
खतुं माओवादीया लागिं ला जनआन्दोलन दबे याःम्ह लोकमानसिंह कार्की थजु वा जनयुद्ध दबे यायेत स्वःम्ह शेरबहादुर देउवा थजु, निम्हं उति हे ग्यं जुइमाः। अथे खःसां पुलांम्ह जुजुया छत्रछायाँय् दरवार हे बचे यायेत लगे जूम्ह मनूयात वहे आन्दोलन मार्फत शक्तिइ वःपिं पार्टीया नेतातय्सं पत्याः यानाः वयागु हे छेँय् वनाः वार्ता यायेगु धाथें नं बांलाःगु ज्या मखु। वास्तवय् नेतात स्यना वनीगु थथे हे यानाः खः। आः धार्मिक ज्याझ्वःया प्रसाद कायेत धकाः वनी, लिपा भ्वय् धकाः वनी, अनं लिपा उमिसं नेतातय्त म्वाः मदुगु स्यनाः पार्टी पार्टी दुने ल्वापु पिकया बी। पुलांम्ह जुजुं अझ नं मौका दत धाःसा शासन याः वये धइकथंया अभिव्यक्ति बीगु यानाच्वंगु दनि। थज्याःगु इलय् वहे पुलांम्ह जुजुं पक्षपोषण यानातःम्ह मनूया छेँय् जूगु नेतातय् वये-वनेयात जनतां मययेकीगु स्वाभाविक खः। नेतातय् थज्याःगु वये-वने ज्यां लोकमानसिंह थेंज्याःपिं कारवाही यायेमानिपिं मनूतय्त कारवाही याये थाकुइ। वास्तवय् थ्व छगू नं दण्डहिनताया मेगु छगू रुप खः। देशय् अपराध याइपिं अप्वइगु, कानुनी राज पलिस्था यायेत थाकुइगुया कारण थुपिं हे खः ।

More Stories Like this