झण्डै ज्ञानेन्द्र नापलायेत्यंगु
कार्कीया छेँय् ज्ञानेन्द्र नापलायेगु प्रचण्डया इच्छा
येँ (सन्ध्या टाइम्स)/नेकां सभापति गिरिजाप्रसाद कोइराला व माओवादी अध्यक्ष प्रचण्ड दथुइ पुलांम्ह मुख्यसचिव लोकमानसिंह कार्कीया छेँय् वंगु खँयात कयाः आलोचना जुयाच्वंगु हे इलय् उगु प्रशंग बारे अझ रोचक जानकारी प्राप्त जूगु दु ।
लोकमानसिंह कार्कीलिसे सतीगु छगू सूत्रं धाः कथं वकुन्हु कोइराला व प्रचण्ड अन खँल्हाबल्हा यानाः लिहां वंगुयां करिब १ घण्टा लिपा पुलांम्ह जुजु ज्ञानेन्द्र नं थ्यंकः वःगु खः। निम्ह पुलांपिं प्रधानमन्त्रीत लिहां वंगुया घौछि लिपा पुलांम्ह जुजु थ्यंकः वःगु घटना संयोग जक धाःसा मखु। सूत्रया कथं कोइराला व प्रचण्ड लिहां वंकाः जक पुलांम्ह जुजुयात वःसां जिउ धइगु खबर थ्यंकाः सःतूगु खः। पुलांम्ह जुजु ज्ञानेन्द्र नं अन करिब घौछि ति हे च्वनाः लिहां वंगु खः।
सूत्रया कथं ज्याझ्वलय् पुलांम्ह जुजुयात नं सःता तयागु दु धाःगुलिं माओवादी अध्यक्ष प्रचण्डं 'अय्सा वय्कःलिसे नं छुं भचा खँ ल्हाये का' धकाः इच्छा प्वंकादीगु खः। प्रचण्डया इच्छा भाजु ज्ञानेन्द्रयात जाहेर याःबलय् वय्कलं 'आः नापलायेगु ई मत्यःनि, ई त्यल कि नापलाये' धकाः लिसः बियाहःगु खँ सूत्रं धाःगु दु ।
यदि भाजु ज्ञानेन्द्रं नं नापलायेगु इच्छा याःगु जूसा वकुन्हु पुलांम्ह मुख्यसचिवया छेँय् निम्ह पुलांपिं प्रधानमन्त्रीतय्सं पुलांम्ह जुजुलिसे वार्तालाप याइगु खः। लिपा नापलायेगु लागिं पुलांम्ह मुख्यसचिव कार्की हे सूत्रधार जुयाः ई मिले याइगु खँ धाःगु दु ।
कार्कीया छेँय् कोइराला व प्रचण्ड थ्यंगु वहे न्हापांखुसी धाःसा मखु। सूत्रया कथं वय्कःपिं वयां छुं न्हि न्ह्यः नं अन थ्यंकेधुंकूगु खः। छुं न्हि न्ह्यः थ्यंबलय् वय्कःपिं अन २२ मिनेट ति भागवत न्यनाः वंगु खः। अले वंगु आइतवाः चाहिं भागवत क्वचाःगु (सांगे) या प्रसाद ग्रहण यायेत थ्यंकः वंगु खः ।
कार्कीया छेँय् कोइराला व प्रचण्ड दथुइ जूगु खँल्हाबल्हाया विवरण पिहां मवःनि। वकुन्हु वय्कःपिं अन च्वनाच्वंगु दु धइगु खँ सीवं पत्रकारत नं ब्वाँय् वंगु खःसा पत्रकारत थ्यने न्ह्यः हे वय्कःपिं छेँनं पिहां वनाछ्वःगु खः ।
उखे माओवादी दुने धाःसा कार्कीया छेँय् पार्टी अध्यक्ष वंगु खँयात कयाः विवाद पिहां वःगु दु। जुजुया शासनकालय् जुजुं तप्यंक हे मुख्यसचिव दयेकूम्ह कार्कीं जनआन्दोलन ब्व-२ दमन यायेत तःधंगु भूमिका म्हितूगु खः। जनआन्दोलन दबे याःपिनि बारे छानबिन यायेत गठन याःगु रायमाझी आयोगं नं कार्कीया नां उल्लेख याःगु दु। अज्याःम्ह आन्दोलनया दोषी धकाः किटान जुयाच्वंम्ह मनूया छेँय् थःगु पार्टीया अध्यक्ष वंगु खँयात पार्टीइ छलफलया विषय दयेकेगु खँ माओवादीया सचिव पोष्टबहादुर बोगटीं धयादीगु खः ।
