अराजकता ब्वलन धाःसा जिम्मेवार सु ?

ताः ई न्ह्यवंनिसें अवरुद्ध जुयाच्वंगु राजनीतिक गतिरोधयात चीकेगु निंतिं थौं तकया ई क्वःछिनाः सहमति कायम यायेगु धकाः राजनीतिक पार्टीतय्सं धायेगु यानाच्वंगु खः ।

तर राजनीतिक पार्टीत थःथःगु अडानं लिमचिउगुलिं यानाः आतलें सहमति जुइ फयाच्वंगु मदु। अझ धायेगु खःसा वंगु निन्हु स्वन्हु न्ह्यवंनिसें राजनीतिक सहमति कायम जुइ कथंया सहलह तकं राजनीतिक वृत्तय् मजुयाच्वंगु नं अजू चायापूगु विषय जुयाबिउगु दु ।

राजनीतिक सहमति कायम जुइ मफुत धाःसा आः छुं न्हि लिपा हे सरकारयात आर्थिक अभाव जुइगु खँ स्वयम सरकारं धयाच्वंगु दु। थ्व धइगु देशय् छगू कथं आर्थिक संकट वइगु खः। थुकिं देया फुक्कं ज्यायात हे प्रभावित याइगु निश्चित दु। अय्नं राजनीतिक समस्या ज्यंकेत गुगुं नं राजनीतिक पार्टीं गम्भीर जुयाः चिउताः मक्यंगुयात छगू विडम्बना हे धायेमाली ।

प्रत्येक राजनीतिक पार्टीया थःथःगु कथंया राजनीतिक सिद्धान्त दयेफु। थःगु हे कथं बाध्यता नं दयेफु तर अथे धकाः देयात हे अन्यौलय् लाका तये मजिउगु खः। तर नेपालय् मजिउगु हे जुयाच्वंगु दु ।

राजनीतिक गतिरोधया कारणं समस्या जुयाच्वंगु धकाः हरेक राजनीतिक पार्टीया नेतातय्सं धायेगु यानाच्वंगु दु। अले थपाय् मछि हाकःगु राजनीतिक अन्यौल चीकेगु धकाः आपालं बैठक नं च्वने धुंकल। अय्नं निकास पिहां मवइगु धइगुया अर्थ छु? राजनीतिक पार्टीया अडानया कारण कन्हय् देशय् अराजकता ब्वलन धाःसा थुकिया जिम्मेवारी काइगु सुनां खः? थुखेपाखे राजनीतिक पार्टीतय्सं बिचाः यायेमाः ।

More Stories Like this