नेवाः नखः स्यंकेगु षडयन्त्र
थुगुसी नं स्वन्तिया तिथि गडबड यानाः पञ्चांग निर्णायक समितिं नेवाःतय् तःधंगु नखःचखःयात स्यंकेगु कुतः याःगु दु। नेवाःतय्सं नेपाल संवत्या न्हूदँ व वकुन्हु हे न्यायेकीगु म्हपुजायात थःपिनि 'राष्ट्रिय पर्व' या रुपय् हनेगु परम्परा न्ह्याका वयाच्वंगु दुसा आः उकियात थ्वहे रुपं न्यायेकेगु धइगु संस्थागत निर्णय तकं जुइधुंकूगु दु। तर पञ्चांग दयेकीपिं ज्योतिषतय्सं मेगु छुं हे नखतय् गडबड मयाःसां थ्वहे नखःया इलय् न्ह्याबलें गडबड पिकायेगु यानाच्वंगु दु। थुकी लगातार हे वयाच्वंगु थ्व गडबडी स्वयेबलय् आः थुमिसं धाथें हे शास्त्रया ल्याःचाः पिकयाः सिबें नं नेवाःतय् थ्व भावनात्मक एकतायात त्वाःथलेगु मनसायं हे थज्याःगु ज्या याइगु खः लाकि धकाः शंका यायेमाःगु अवस्था पिकया बिउगु दुसा सर्वसाधारण नेवाःतय्सं थुकियात अज्याःगु हे षडयन्त्र जुइमाः धकाः शंका याना मच्वंगु नं मखु ।
धाथें स्वयेगु खःसा स्वन्तिया म्हपुजाय् ति तिथिया गडबडी मेगु छुं हे नखतय् वःगु झीसं मसिउ। म्हपुजा सुं हे खय्ब्रम्हूतय् हनेमाःगु नखः मखु। थ्व मात्र नेवाःतय्सं जक हनीगु व सकल नेवाःतय्त भावनात्मक रुपं एकताया माः हना बीगु नखः खः। उकिं खय् ब्रम्हू ज्योतिषतय्सं थुकियात हलुका रुपं काइगु जक मखु अझ जिउसा नेवाःतय् मौलिक नखःचखः स्यंकाछ्वयेगु मनसाय तकं तयातःगु खनेदु ।
थुगुसी नं यानातःगु थुगु कथित गडबढीयात हाचां गायाः थःगु मौलिक नखः न्यायेकेगु लागिं नेपालभाषा मंकाः खलः लगायतया नेवाः खलः पुचः व सम्बन्धित बुद्धिजीवीतय्सं याःगु पहल च्वछाये बह जू, व सकल नेवाःतय्सं उकियात हे नाला कायेमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
