मचाम्ह वैज्ञानिक

हरिकृष्ण डंगोल

झिंनिदँया मस्तय्सं फुर्सद वा स्कूल बिदाया इलय् गुकथं ई छ्यलाच्वनी धकाः सुनानं न्यन धाःसा झी अप्वःसिया लिसः चाःचिहिलाः, भिडियो गेम म्हिताः वा म्वाः मदुगु उटपट्यांग ज्या यानाः फुकाच्वनी धइगु जुइफु। तर अपवादया रुपय् छम्ह निम्ह मस्तय्सं बिदा वा फुर्सदया इलय् नं सिर्जनात्मक ज्या यानाः न्हि छ्यानाच्वनी। अले थःगु बिस्कं म्हसीका बियाच्वनी। थथे अपवादया रुपय् खने दइपिं छम्ह निम्ह मस्तय्गु ल्याखय् मचा ल्याय्म्ह अञ्जित तण्डुकार नं ला वः गुम्हेस्यां झिंनिदँया क्यातुगु उमेरय् हे 'इमेजिन' धइगु सफुली वैज्ञानिक विचाःत न्ह्यब्वयाः थःगु बिस्कं पहिचान बीत सफल जूगु दु ।

झिंनिदँया अञ्जितया विचाः दु - झीपिं शिक्षा कायेत स्कूल वनाच्वना, गुगु लजगाःया लागि महत्वपूर्ण खः। तर थःहे सिर्जनशील मजुइकं स्कूलया शिक्षां जक दक्षता हासिल याये फइ मखु। बिदाया इलय् मस्त अझ सिर्जनशील ज्या यायेत प्रेरित जुइ। जिं थ्व सफू वंगु दँया चिकुलाया बिदाया इलय् च्वयागु खः ।

बौ डा. ज्योति तण्डुकार व मां अबनी तण्डुकारया कोखं अञ्जितया जन्म मे १, १९९७ स न्यतय् जूगु खः। थौंकन्हय् जिस्वां मार्ग, नयांबजारय् च्वनाच्वंगु दु। अले थौंकन्हय् अञ्जित शुभतारा स्कूलया न्हय्गू तगिमय् ब्वनाच्वंगु दु। वया बौ छम्ह इलेक्ट्रिकल इन्जिनियर खः। शिक्षित परिवारय् जन्म जूम्ह अञ्जितयात न्हून्हूगु खँ सीके यः। उकिं ताः बिदाया इलय् वयात स्कूलया होमवर्क स्वयां सिर्जनशील ज्या याये यः। उकिं वं धाइ - मस्तय्त होमवर्क यक्व बी मजिउ छाय्धाःसां अथे जुलकि इमिसं थः छचाःलिं च्वंगु मेगु थीथी खँय् छुं बिचाः याये फइ मखु। विदाया इलय् ला झन होमवर्क बी हे मजिउ धइगु वया क्वातुगु बिचाः दु।
वास्तवय् अञ्जितयात म्वाःमदुगु खँय् तक्यना च्वने मयः। वयात विज्ञान व एष्ट्रोनोमी विषय यः। टेबुलटेनिस, फुटबल व चेस म्हिते यः। अले पृथ्वीया थीथी खँय् दुवाला च्वने यः। सगोल परिवारय् च्वनाच्वंम्ह अञ्जितयात गुरुपिनिगु जिद्दी पह मयः। खःगु खँय् गुरुपिंसं नं विद्यार्थीतय्गु विचाः न्यनेमाः धइगु अञ्जितया धापू दु ।

स्कूल व स्कूलया गुरुजनप्रति अञ्जितया भचा नकारात्मक भावना दु। थ्व खँय् अञ्जितया बौ डा. ज्योति तण्डुकारं कनादी - निगूगु तगिमय् ब्वनाच्वंगु इलय् छकः गुरुजनं वृहस्पतिया तारा ३१ गः दु धकाः धाल थें तर अञ्जितं थम्हं गनं ब्वनागु वा खंगुया आधारय् ६१ गः दु धकाः लिसः बिल। तर गुरुं थःगु कोर्श बुकया आधारय् ३१ गः हे खः धकाः जिद्दी यात। अनंनिसें अञ्जितयाके स्कूल व गुरुवर्गप्रति भचा नकारात्मक भावना ब्वलानावःगु जुयाच्वन। थ्व सफूया भूमिका च्वयादीम्ह डेभलेपमेण्ट साइकोलोजिष्ट प्रो. करेन पाइनं नं धयादीगु दु - वयस्क जूगु नातां झीसं बिचाः याइ झीके दक्व खँया लिसः दु व झीगु भूमिका धइगु हे मस्तय्त स्यनेगु खः। तर मस्तय्सं जक मखु, वयस्कतय्सं नं झिंनिदँया अञ्जितया बिचाः (इमेजिन)पाखें यक्व खँ स्यना काये फइगु खनेदु ।

खय्त नं थ्व सफुली थ्व आकाश स्वयां तापाक छु दु थें? सफुली ब्वना थें वा टेलिभिजनं क्यं थें थ्व पृथ्वीइ एलियन दु ला? मनूतय्गु ल्याः अप्वया वन धाःसा छु जुइ ?

उडन-तस्तरी धा थें दु ला? थ्व ब्रम्हाण्ड गथे जुयाः दत? थ्व ब्रम्हाण्डया मानवजाति झी याकःचा खः ला? आदि थीथी न्ह्यसःया लिसः थःगु हे ढंगं बियातःगु दु। अञ्जितया बिचाःत मननयोग्य जू। सखे थथे हे जुयाः मचा ल्याय्म्हया इलय् हे अञ्जितं थःगु बिस्कं पहिचान बीत सफल जूगु दु। जिज्ञासु अञ्जितया थज्याःगु हे फुटकर च्वसात अझ उखेथुखे लानाच्वंगु दनि। अञ्जितयात प्रकाशन व प्रसारणय् वयेगु उलि मयः। यद्यपि वया बौ ज्योति तण्डुकारं धयादी - थ्व नं प्रकाशनय् हयेगु योजना दु ।

More Stories Like this