क्रम न्ह्याइ

नर्मदेश्वर प्रधान

मोहनि नखः। क्वचाल। वःगु हे मचाः। फुत। मचाबलं लछि न्ह्यवंनिसेंमोहनिया धून थ्वइ। मोहनि वइ। भुतमालि ब्वयेके। न्हूगु वसः फी। उबलय् जिमि संयुक्त परिवार। तःबाः। ककापिं फुक्क नाप। झ्वःछुनाः भ्वय् नये। न्हापा लिपा थीथी नयेगु। नखःचखः वइ। सकलें नाप जुइ। भौमस्त भुतुली। जोरजामय् व्यस्त। मोहनिया न्हू न्हूगु पर्सि सिना तइ। नखःज्वःछि सकलें नाप नयेगु। न्ह्याइपुसे च्वनी। जिमि तःबाः। थकालि। थःगु हे सिद्धान्त दु वया ।

मोहनिबलय् न्हिथ्याक पुजा याये मजिउ। नये मजिउ। पुजा याकनं याइ मखु। द्यांलाना च्वनीपिं नं दइ। मोहनिबलय् छकः द्यांलायेगु ला खःनि। तःबाःया तर्क जुइ। लिबाक पुजा याइ। निघौ स्वघौ बिकी। पुजा ज्वलनय् छुं छता मन्त कि पुजा दी। 'तुरुन्त न्याना हिं।' उजं बी। चूमलातले सुम्क च्वनी। नियमय् च्वनी। भ्याःभति हे उखेथुखे याइ मखु। स्वघौ प्यघौ बिकाः पुजा क्वचायेकी। स्वां बी। मर्यादाक्रम स्यंके बी मखु। दथुं सुनां नं स्वां काये दइ मखु। स्वां बी क्वमचातले सुनां नं नये मदु। तःबाः थकालि। तःबाः झ्वलय् फय्तुल कि तिनि भ्वय् न्ह्याइ। झ्वलय् मवःतले सुनां नं नये मदु। तःबाः झ्वलय् च्वंवइ। नये न्ह्यःया विधि दइ। पूवंकी। अले नइ। तःबाः नं नल कि तिनि मेपिंसं म्हुतु संके दइ। मोहनि भ्वय् नयेगु अक्सर न्हिनय्सिया न्याताः लिपा जुइ। जिपिं मस्त। बिचय् नयेमदु। झ्वलय् च्वनेमाः। नियम पालन यायेमाः ।

'वल वल, ज्वँ ज्वँ। चयत्।' प्यखेरं हासः ताये दइ। जिमिगु पल्लिइ जःलाखःला मस्त ब्वाँय् ब्वाँय् जुइ। जिपिं भ्वय् नयाच्वने। जिमि ध्यान च्वय् कःसी जस्ताय् जुइ। थःथाय् वःगु भुतिमालि कर्पिसं काल जुइ। जिमि मन आकासय्। तन बैगलय्। बन्धनय् लाःगु अनुभव जुइ। थकालि मदंकं दने मजिउ। जिमि तःबाःया सैनिक नियम। पल्लिइ वने दःसा जिउ। नुगः पिपिच्याइ। तर छु याये। थने बी मखु। च्वफायेगु त्वहः तये। अभिनय याये। पल्लिइ वने। भुतिमालि ब्वयेके। जुक्ति याये। 'आसे सिधइन।' थकालिं गनी। पत्तिंचा ध्वस्वाकी। बल्ल्ल सिसाबुसा हइ। 'ग्व लैं?' तःबाः थकालिं न्ह्यसः तइ। नकीपिं भ्वयेभ्वये कनी। लैं दइ मखु। महःतले तःबाः दनी मखु। ईया खँ मखु। तःधंगु नखः। रित पूरा याये हे माः। सर्टकटया खँ जुइ मखु। दछिइ छकः वइगु नखः। छोटकरी याये दइ मखु। रितिथिति स्यंके मजिउ। तःबाःया आदर्श जुइ। थकालि। सुनां नं छुं धायेगु खँ जुइ मखु। नखः जात्राय् थकालि माने यायेमाः। सामाजिक सांस्कृतिक परम्परा जुइ। सुनां नं थकालियात कुँखिने फइ मखु।
उबलय् मचा इलय्। तःबाः खना गुलि तं वइ। उलि कडाम्ह थकालि। भुतिमालि ब्वयेकेगु शुद्ध इलय्। भ्वय् झ्वलय् लाइ। काइ। जेलय् थें। भौमस्त। द्यां लानाच्वनी। मिजंतय् नये क्वचायेकी। अले तिनि उमि नये दइ। बुरां इलय् पुज्याना बिउसा गुलि जिउ! इलय् नये खनी। न्ह्याइपुइ। नखः नखः थें च्वनी। भौमचातय् कुइँकुइँ हाःगु प्वंप्वाथं गुलि धाः जुइ।
थौं। मोहनि नखलं पहः हिले धुंकल। पुलांगु न्हि। चलन। बाखं थें जुइ। खः ला मखु ला थें। पुलांगु संयुक्त संरचना थौं तनी। म्हिगःया मोहनि। झ्वःछुनाः नयेगु चलन। कूछि भ्वय्। सीकाः भ्वय्। गन गन लिउने। तं थें। त्वःफिउ थें जुइ। म्हिगःया झ्वः भ्वय्। थौं टेबुलया गोलाकारय् परिणत जुइ। टेबलय् च्वनाः भ्वय् नइ। सु थकालि, सु क्वकालि। भू दइ मखु। थः थःगु इलय् वइ। नइ। वनी। नैपिंत थौं छूट दइ। सुनां सुयातं पनी मखु। गनी मखु। वाउँगु लप्ते। तुयू बजि। हाकुमुस्या। बाउँचा पाउँचा। भ्वजं विस्थापित जुजुं वनी। इटालियन खाना। थाई फुड। चाइनिज डिस। मोहनियात थौं
'रिमिक्सं' थी ।

बैस वनी। मोहनियात खनीगु दृष्टि पानाबी। मचाबलय्। मोहनि गुलि न्ह्याइपु। फुइ। ग्याः। तर थौं ठीक अःखः। न्हू न्हूगु वसः पुने। बांलाके। साःसाःगु नये। छुं सोख दइ मखु। थ्व नये मजिउ, व नये मजिउ। वन्देजं चिना हइ। नये पुनेया सौख दुपिंत। सम्पन्नपिंत। मोहनि पीम्वाः। सदां मोहनि जुइ। मदुपिंत, मजिउपिंत मोहनि वयां छु याये! मोहनि जुइ मखु ।

मचाबलय्। भुतिमालि ब्वयेके। मोहनिया आकर्षण जुइ। भुतिमालि। भुतिमालि च्वय् च्वय् थ्यनी। भुतिमालि लिसे आकासय् ब्वया च्वनागु अनुभव जुइ। भुतिमालिं गबलें बेइमान नइ। ग्वाः तये। फुइँ काये। गबलें न्ह्यपं छुइ। न्ह्यप्यंवाल भुतिमालि ब्वयेके। गबलें भुतिमालि घःमां लुइ। न्ह्याइपुइ। स्वयाच्वने। थःगु ल्हातय् लत्ताइ। सुका त्वःते। साले ।

थौं मचा मखय् धुंकल। उमेर वनी। तर फुक्क अःखः ताइ। ई पाइ। परिस्थिति हिली। थःगु भूमिका हिली। म्हिगः। मोहनि इलय्। न्ह्याइपुक भुतिमालि ब्वयेकेगु। थौं थःहे भुतिमालि जुया बी। सुनां नं थःत ब्वयेका च्वंथें। तुला च्वंथें। संकाः च्वंथें अनुभव जुइ ।

सुथ जुइ। दने। अखबार ब्वने। बुखँत स्वये। बुखँतसें थःत भुतिमालि ब्वयेकी। गबलें क्वय् हइ। गबलें च्वय् यनी। सुन्य आकासय्। देशया नेता। बजारया भाः। मचाखाचा। फुकसियां ब्वयेकीगु भुतिमालि जुया बी जि थौं। छथासं चय्त जुइ। मेम्हसिनं लाइ। ब्वयेकी। गबलें ग्वाः तइ। न्हिप्यं घाकी। मचाबलय् जिगु ल्हातय् लतांइ दइ। थौं जि फगत भुतिमालि जुइ। ब्वयेकीपिनि ल्हातय्। ब्वयेकीपिंसं ल्वाकी। चाना छ्वइ। प्वंगु आकासय्। जि गबलें फान्टाफुन्टुं फान्टाफुन्टुं जुइ। गबलें गन जूवनी। गबलें गन। चाना वंगु भुतिमालि। सुनां नं हानं लाइ। हानं ब्वयेकी। थथे हे क्रम न्ह्याइ। बस ।

narapradhan@yahoo.com

More Stories Like this