'छन्हु निन्हुं समस्या ज्यनी'

नागरिक सर्वोच्चता दावय् पाये मखु: माओवादी

येँ (सन्ध्या टाइम्स)/छन्हु निन्हुया दुने राजनीतिक गतिरोध चिला वनीगु खँ एमाले अध्यक्ष झलनाथ खनालं धयादीगु दु।
थौं सुथय् किपुली शुरु जूगु सोल्टी होटेल क्राउन प्लाजां ग्वसाः ग्वःगु सोल्टी सुपर सिक्सेज-२००९ या ज्याझ्वलय् थ्यंम्ह खनालं थौं सुथय् पत्रकारतलिसे खँ ल्हासें उगु खँ धयादीगु खः ।

वय्कलं समन्वय व सहलह जारी जुयाच्वंगु खँ कनादिसें कन्हय् व कंसया दुने सहमति कायम जुइगु खँ नं कनादीगु दु।
उगु हे ज्याझ्वलय् झाःम्ह कांग्रेसया उपसभापति रामचन्द्र पौडेलं सहमतिया निंतिं राष्ट्रपतिया बारे छुं हे खँ ल्ह्वनेमाःगु आवश्यकता मदु धयादिल ।

राजनीतिक गतिरोध अन्त्य यायेगु निंतिं सहमतिइ थ्यंकेगु बाहेक दलतय्के मेगु विकल्प मदु धासें वय्कलं माओवादीं ल्ह्वनाच्वंगु नागरिक सर्वोच्चता अनावश्यक खँ खः धयादिल।
उगु हे ज्याझ्वलय् ब्वति काःझाःम्ह माओवादी पोलिटब्युरो दुजः पोष्टबहादुर बोगटीं धाःसा राष्ट्रपति व नागरिक सर्वोच्चताया बारे थःपिंसं ल्ह्वनागु माग कार्यान्वयन मजुइगु खःसा सहमति जुइ मफइगु खँ कनादिल ।

याकनं हे निकास पिहां वइगु खँय् थःपिं आशावादी जुयाच्वनागु खँ कनादिसें वय्कलं नागरिक सर्वोच्चतायात दावय् पानाः थःपिंसं सहमति मयायेगु खँ नं स्पष्ट यानादिल।
थ्व हे झ्वलय् सीदु कथं थौं माओवादी व कांग्रेस दथुइ सहलह जुइ फइगु सम्भावना दु। माओवादी प्रवक्ता दिनानाथ शर्मां बियादीगु जानकारी कथं थौं कांग्रेस व माओवादी दथुइ सहलहया तयारी जुयाच्वंगु दु। तर थाय् व ई धाःसा अझ नं क्वःमजिउनिगु खँ वय्कलं कनादिल ।

उखे माओवादीया सचिव सीपी गजुरेलं यदि स्वन्ति तकया दुने राजनीतिक सहमति कायम जुइ मफुत धाःसा माओवादीं न्ह्याकीगु आन्दोलन जनविद्रोहया स्तर तकं वने फइगु ख्याच्वः बियादीगु दु ।

थौं सुथय् नेपाल क्रान्तिकारी पत्रकार संघ मोरङं ग्वसाः ग्वःगु पत्रकार सम्मेलनय् न्ववासें वय्कलं उगु खँ धयादीगु खः।
'आः माओवादीं न्ह्याकीगु आन्दोलन मोहनि न्ह्यःया आन्दोलन थें जुइ मखु' भाजु गजुरेलं धयादिल ।

लुमंकेबहः जू, म्हीग च्वंगु माओवादी स्थायी समितिया बैठकं स्वन्तिया दुने राजनीतिक सहमति कायम मजुल धाःसा स्वन्ति लिपा आन्दोलन यायेगु निर्णय याःगु खः ।