प्रम-प्रचण्ड वार्ता नं विफल

कोइरालायात प्रम याये धयागु मदु: बाबुराम

येँ (सन्ध्या टाइम्स)/राजनीतिक गतिरोध अन्त्य यायेगु निंतिं न्ह्यानाच्वंगु कुतः तकं ताः मलानाच्वंगु इलय् थौं प्रधानमन्त्री माधव नेपाल व माओवादी अध्यक्ष पुष्पकमल दाहाल 'प्रचण्ड' दथुइ सहलह जूगु दु ।

माओवादी नेता हिसिला यमिया तता कयोदेवी यमिया कोटेश्वरय् च्वंगु छेँय् वय्कःपिनि दथुइ सहलह जूगु खः।
२१ गते तक राजनीतिक गतिरोध चीकेगु धकाः कांग्रेस व एमालेया कार्यदलं मंकाः प्रस्ताव तयार याःगु खःसा उकियात माओवादीं अस्वीकार यायेवं ब्वलनाच्वंगु राजनीतिक शुन्यताया दथुइ थौं प्रम नेपाल व अध्यक्ष प्रचण्ड नापलायेगु ज्या जूगु खः ।

वय्कःपिनि दथुइ जूगु खँल्हाबल्हा लिपा सञ्चारकर्मितलिसे खँ ल्हासें प्रम नेपालं थौंया वार्ताय् ठोस निर्णय मजूसां नं वार्ता धाःसा सकारात्मक जूगु प्रतिक्रिया बियादीगु दु। अथे हे वय्कलं सुयातं लिच्वः मलाइ कथं समाधान मालेगु खँ कनादीगु दु ।

सञ्चारकर्मीत लिसे खँ ल्हायेगु झ्वलय् वय्कलं दलतलिसे सहमति यानाः संसदया गतिरोध चीकाः देय्या शान्ति प्रक्रियायात निर्ष्कषय् थ्यंकेगु खँ नं कनादीगु दु ।

थ्व स्वयां न्ह्यः कांग्रेस सभापति गिरिजाप्रसाद कोइराला व प्रचण्डया दथुइ म्हिगः जक पुलांम्ह मुख्यसचिव लोकमानसिंह कार्कीया छेँय् गोप्य खँल्हाबल्हा जूगु खः।
करिब १५ मिनेट न्ह्याःगु उगु बैठकय् छु खँ जुल धइगु सीमदुनि। म्हिगःया वार्ताय् न्ह्यानाच्वंगु राजनीतिक गतिरोध अन्त्य यायेगु व सरकारया गतिविधियात कयाः खँल्हाबल्हा जूगु अनुमान जुयाच्वंगु दु ।

वंगु स्वन्हु न्ह्यवंनिसें राजनीतिक पार्टीतय् दथुइ गुगुं नं कथंया स्वापू मदयेवं थन थीथी कथंया आशंका नं ब्वलनाच्वंगु खः। २१ गते च्वनीगु सदनया बैठक न्ह्यः हे सहमति कायम यायेगु धाःसां नं एमाले व कांग्रेसं तयार याःगु मंकाः संकल्प प्रस्तावय् माओवादीं असहमति क्यनेवं राजनीतिक दलतय् दथुइ स्वापू त्वाःदःगु अनुमान तकं राजनीतिक वृत्तय् जूगु खः ।

उखे म्हिगः कोइराला व प्रचण्डया दथुइ जूगु वार्ताय् प्रचण्डं कोइरालायात प्रधानमन्त्री जुइत प्रस्ताव यात धइगु खँयात माओवादी उपाध्यक्ष डा. बाबुराम भट्टराईनं खण्डन यानादीगु दु। थौं सुथय् पाल्पाय् जूगु छगू ज्याझ्वलय् न्ववायेगु झ्वलय् वय्कलं थःपिं दकलय् न्हापां नागरिक सर्वोच्चताया पक्षय् दुगुलिं सरकार थःपिनि प्राथमिकता मखु धयादिल ।