विकास क्रमय् चीनया खुइदँ

चीनय् कम्युनिष्ट पार्टीं सत्ता कब्जा याःगु ६० दँ क्यंगु लसतायात थुगुसी जिक्व तःजिक न्यायेकल। चीनं थुगुसी न्यायेकूगु थ्व खुइदँ बुन्हि थःगु देशया जनतायात क्यनेगु सिबें नं विश्वयात क्यनेगुपाखे उन्मुख जुयाच्वंगु विश्लेषण चीनयात म्हसिउपिं विज्ञतय्सं यानाच्वंगु दु। वास्तवय् थुगुसी चीनया उद्देश्य अथे हे नं खः। चीनं वंगु खुइदँया दुने विकास याःगु सम्पूर्ण उपलब्धी खास यानाः सामरिक शक्तियात वंगु खुइदँ समारोहय् क्यनेगु ज्या यात। चीनया उगु प्रदर्शनपाखें विश्व थ्व धायेत बाध्य जुल कि वंगु खुइदँ चीनया लागिं धाथें नं उपलब्धीपूर्ण जूगु दु। अथे खःसां उमिसं थथे नं धायेगु मत्वःतूनि कि चीनं याःगु थ्व विकास कम्युनिष्ट सिद्धान्तं हःगु विकास धाःसा मखु। छाय्धाःसां चीनं कम्युनिष्ट बिचाःयात त्वःतूगु यक्व दयेधुंकल, अय् जूगुलिं चीनया थ्व विकासयात कम्युनिष्ट बिचारं हःगु विकास धाये मजिउ। गन गन चीनया बांमलाःगु खँ वइ अन अन वयात कम्युनिष्ट देश धायेगु, गन गन बांलाःगु खँ वइ अन अन चीन कम्युनिष्ट सिद्धान्तं लिचिलेधुंकल धायेगु निखें त्यःगु खँ ल्हाइपिनि धापू खः थ्व। खतुं मुलुक विकास यायेगु खःसा बिचाः जक बांलानां मगाः। उकिया लागिं नेतातय्के इमान्दारीपूर्ण प्रतिवद्धता व जनतायाके जाँगर नं दयेकेमाः। थ्वहे प्रतिवद्धता व जाँगरया कारणं हे विश्वय् कम्युनिष्ट खःपिं व मखुपिं देशतय्सं विकास याःगु यक्व उदाहरण दु। चीनं विकास याःगुया लिउने नं थ्व कारणया अप्वः ल्हाः दयेमाः। यदि नेतात खराब व जनता अल्छि जुल धाःसा न्ह्यागु हे सिद्धान्तं नं देश विकास याये फइ मखु। विकासया सन्दर्भय् थ्व पक्षयात दकलय् ध्यान बीमाः ।

More Stories Like this