ल्हाः निपा मदया च्वन

समान्त

'जननिर्वाचित सरकारया नेतृत्वय् तुपः दयेमा ।'

'रत्नाकर वाल्मिकि जुइ फुसा हिफ्वः द्यः छाय् बुद्ध जुइ मफइ?'
थ्व निगू धापु प्रधानमन्त्री व प्रतिपक्ष दलया नेताया दथुइ जूगु वाकयुद्धय् पिज्वःगु खः। नेपाःमितय् गज्याःगु विडम्बना? न्हू नेपाःया निर्माण यायेत सकल नेपाःमिया ल्हाः ल्ह्वनाच्वंगु इलय् एकिकृत नेकपा (माओवादी) विरुद्ध नीनिगू राजनीतिक दल जानाः वाकयुद्ध यायेगु व माओवादीयात याकःचा यानाः निषेध कुतः राजनीतिक पार्टीतय्सं यानाच्वन ।

आः वइगु जेठय् जननिर्वाचित सभासद्पाखें संविधान च्वये सिधेयेकाः न्हूगु संविधान जारी यायेमाःगु जिम्मेवारी दु। छपलाः न्ह्यचिलाः धायेगु खःसा संविधान जारी याये न्ह्यः माओवादीया लडाकुतय् व्यवस्थापन व समायोजन यानाः शान्ति प्रक्रियायात निष्कर्ष थ्यंकाः देय् व जनतायात धाथेंया शान्तिया अनुभूति यायेकेगु खः ।

तर राजनीतिक दलतय्गु आरोप प्रत्यारोपया हुनिं इलय् संविधान निर्माण जुइगु व शान्ति प्रक्रिया निष्कर्ष थ्यनी धइगु विश्वास नेपाःमि जनता याये फयाच्वंगु मदु। राजनीतिक दलं छम्हं मेम्हेसित दोष बीगु। सहमति व सहकार्यया संस्कारयात चीकाः संविधान दयेकेगु व शान्ति प्रक्रियायात निष्कर्ष थ्यंकेत थःगु नेतृत्व ज्या जुइमाः धकाः अहम् ब्वया थःत सर्वश्रेष्ठ तायेकेगु व इलय् संविधान दयेके फइ मखु हाका हाकी धायेगु याना हयेधुंकल ।

सरकारया नेतृत्व यानाच्वंम्ह एमाले सत्ता थःगु ल्हातं चुलुब्यनाः मवनेमा धकाः सत्ता साझेदारी राजनीतिक दलतय्त ह्ययेकेत मन्त्रिमण्डल विस्तार यानाः देयात अनावश्यक आर्थिक भार क्वबीकूगु जक मखु थ्व सरकारयात राष्ट्रिय सरकार खः धकाः सर्वसाधारण जनतायात लःखय् मिखा कंकेगु यानाच्वंगु दु। प्रतिपक्षयात सरकारय् वयाः राष्ट्रिय सरकारया स्वरुप बीत इनाप नं यायेगु तर पाय्छि लकस मदयेकुसे राष्ट्रपतिं सेना सम्बन्धय् ल्ह्वंगु पलाः विरुद्ध हःगु संकल्प प्रस्तावयात सदनय् सहलह याये दइ मखु धकाः विपक्षया माग छगू पूमवंकिम्ह सरकारयात गथे याना राष्ट्रिय सरकार धाये फइ ?

थ्व देशय् नागरिक सर्वोच्चता गुब्सं कायम जुइ फूगु मदु। जुजु, जुजु धुंकाः सैनिक। सैनिक धुंकाः सामन्ती सर्वोच्चताया संस्कारं हा कयाच्वंगु थ्व देशय् नागरिक सर्वोच्चताया खँ कांग्रेस व एमालेयात घुर्के मफइगु खँ जुल। गथे २०६२/६३ न्ह्यः कांग्रेस व एमालेयात गणतन्त्र घुर्का छ्वये मफूगु खः ।

जुजुयात चीकाः देय् लोकतान्त्रिक गणतन्त्रय् वनेधुंकाः नं यथास्थितिवादयात हे नेपाःमि जनतां स्वीकार यायेमाःगु खःसा नेपाःमि जनताया बलिदानया छु अर्थ? कांग्रेस व एमालेयात सैनिक सर्वोच्चता स्वीकार यायेत गूगु अदृश्य शक्ति प्रेरित यानाच्वन? थ्व गम्भिर न्ह्यसः खः।

प्रधानमन्त्री माधव नेपाल संविधानसभाया निगु चुनाव क्षेत्रं नं बुम्हं खः। अथे खयां नं थौं नेपाःया प्रधानमन्त्री जुयाच्वंगु दु। थ्व अहंकार प्रधानमन्त्रीयात आक्रमक दयेका बिउगु दु। वय्कःया आक्रमक शैली थुलि निम्नस्तरया जुया बी, छम्ह देया उच्चपदस्त व्यक्तिया निंतिं गूगु हालतय् नं ल्वःगु मखु। तर प्रधानमन्त्री विपक्षया कुँखिनायात वहे स्तरं प्रतिक्रिया उघिरमय् बिया बी। जिम्मेवार पार्टीया वरिष्ठ नेतां खिचां न्यात धकाः खिचायात वां न्याःवनेगु धापुयात चरितार्थ याः वनेगु पाय्छि खः ला? प्रधानमन्त्रीया खँग्वः धुकुतिइ लचकता व क्वमिलु जुइगु खँग्वः मदु ला? अथे जुयाः हे सहमति व सहकार्यया राजनीतियात हाकु तिनाः माओवादीयात उत्तेजित यायेगु व संविधानसभायात विघटन यानाः राष्ट्रपतिय शासन हयेगु ग्वसाः ग्वयाः च्वंगु खः। थ्व फुक्कं ज्या यानाच्वंगु धइगु संविधान च्वये मफूगु, शान्ति प्रक्रिया निष्कर्ष मथ्यंगु दोष फुकं माओवादीया छयंनय् तयाः थः बचे जुइगु म्हंगस जक खः ।

झिदँ तक जनयुद्धया नामय् सशस्त्र विद्रोह यानाः नं लँ दथुइ हे दिपा कयाः प्रतिक्रियावादीतय् नाप जनआन्दोलनया सहकार्य यानाः नेपाःयात गणतान्त्रिक देय् दयेकेत व संविधानसभाया चुनाव याकेत ताःलाम्हं माओवादी थौं पीगु प्रतिशत सिट हयाः नं युगान्तकारी हिउपाः ला छु जनताया न्हिया न्हिथंया मजि मगाःगु वस्तुया भाः थहां वनाच्वंसां छसः तये फूगु मखु। नागरिक सर्वोच्चताया निंतिं हे जक ल्वानाः देय् न्ह्याये फइ ला? दथुइ हे दिपाः काःगु जनयुद्धं नेपाःमि जनतायात शान्ति व अग्रगमन मखु महँगी, अभाव, बन्द, हड्ताल, हत्या, हिंसा, अराजकता दण्डहिनता व अनुशासनहिनताया समाज नेपाःमि जनतां लोकतान्त्रिक गणतन्त्रय् दोहलपा फयेमाःगु दु ।

न्हू नेपाः निर्माण यायेगु सकसिगु तातुना खः। थ्व तातुनाय् सकल नेपाःमि जानाच्वंगु नं दु। प्रमुख राजनीतक दल कांग्रेस, एमाले व माओवादी न्हू नेपाः दयेके धकाः हे छप्पँ जुयाः हे मंकाः कथं आन्दोलनया नेतृत्व याःगु खः। तर थौं शान्ति प्रक्रियायात निष्कर्षय् थ्यंकेगु व संविधान निर्माण यायेगु ज्याय् सहकार्य व सहमतिया संस्कारयात त्वःताः जंगलय् छ्वयेगु व जेलय् तयेगु धकाः ल्वाना च्वनेगु गुलि तक पाय्छि खः? देय् दयेकेगु फुकसिगु इच्छा खः। तर फुकसिगु ल्हाः जायेमाःगु नं खः। तर ल्हाः जायेगु पलेसा म्हुतु जानाच्वन। थ्व तःधंगु विडम्बना खः ।

छम्ह अल्सिम्ह थः पासायात धाल, पासा छं उलिमछि प्रगति यात, तर छं छक्वः हे जितः सःताः नकूगु मखु। कन्हय् जि छंथाय् नः वयेगु जुल। नसाः ज्वरे याकाति खँ ला धकाः वन। कन्हय् कुन्हु पासाया छेँय् थ्यंकाः धाल, का भाइ जिला थ्यंकः वयेधुन नसाः ज्वलं तयार जुल मखु ला ?

पासा, तयार ला जुल। तर छगू चिज मदया च्वन। छु चिज?
ज्वरे यायेत ल्हाः निपाः मदयाच्वन का। नेपाःया थौया स्थिति नं थथे जुयाच्वंगु खः ।

samant_writer@yahoo.com

More Stories Like this