सहमति मजूसा सशक्त आन्दोलन
माओवादी स्थायी समितिपाखें थीथी निर्णय
येँ (सन्ध्या टाइम्स)/स्वन्तिया इलय् तक नं गुगुं कथंया राजनीतिक सहमति कायम मजुल धाःसा माओवादीं सशक्त आन्दोलन यायेगु निर्णय याःगु दु ।
माओवादीया मू ज्याकुथी थौं सुथय् च्वंगु स्थायी समितिया बैठकं उगु निर्णय याःगु खः ।
राजनीतिक गतिरोधया अन्त्यया निंतिं माओवादीं ल्ह्वना वयाच्वंगु नागरिक सर्वोच्चता व राष्ट्रपतिया पलाःया बारे ठोस निकासा मवल धाःसा स्वन्ति लिपा सशक्त आन्दोलन यायेगु निर्णय जूगु खँ पार्टी प्रवक्ता दिनानाथ शर्मा थौं पत्रकारत लिसे खँ ल्हायेगु झ्वलय् कनादीगु दु। वय्कलं असोज लछियंकं दलत लिसे सहलह व सहमतिया कुतः न्ह्याकेगु जानकारी नं बियादीगु दु ।
पत्रकारतलिसे खँ ल्हायेगु झ्वलय् प्रवक्ता शर्मां राजनीतिक निकासया निंतिं राजनीतिक पार्टीत उदासिन जूगु द्वपं बियादिसें सहमतिया निंतिं थःपिं क्वमिलु जुइत तयार दुगु खँ नं कनादीगु दु ।
'फयांफछि राजनीतिक पार्टीया दथुइ सहमति कायम यायेगु कुतः जुइ' वय्कलं धयादी ।
थःपिनि मागय् गुगुं नं कथं संवोधन जुइमाःगु खँ कनादिसें वय्कलं राष्ट्रपतिया खँ असंवैधानिक खः धइगु कांग्रेस व एमालेया कार्यदलं दयेकूगु मंकाः संकल्प प्रस्तावय् दुथ्याकेमाःगु खँ नं वय्कलं धयादीगु दु ।
कांग्रेसं राष्ट्रपतिया पलाःया बारे गुगुं नं कथंया खँ न्ह्यथने मजिउ धकाः धयाच्वंगु खँ पञ्चायती इलय् जुजुपिंसं याःगु खँय् न्ह्यसः थने मजिउ धाये थें जूगु बिचाः नं वय्कलं प्वंकादीगु दु ।
'कांग्रेसया थ्व धापू अधिनायकवादी खः' वय्कलं धयादी।
माआवादीया थौंया बैठकं महाधिवेशन तयारी व संगठन परिचालनया निंतिं थीथी झिंच्यागू विभाग नं गठन याःगु दु।
बैठकय् संगठन विभागया प्रमुख व वरिष्ठ उपाध्यक्ष मोहन बैद्य (किरणं) न्ह्यब्वःगु सांगठनिक प्रतिवेदन पारित यासें महाधिवेशनय् अध्यक्ष प्रचण्डपाखें राजनीतिक प्रतिवेदन व उपाध्यक्ष बैद्यं संशोधित विधान न्ह्यब्वयेगु जिम्मेवारी बीगु नं क्वःछिउगु दु ।
बैठकं पोलिटब्यूरो दुजःत सकसिनं छवाःया दुने गाडी पार्टीयात लःल्हायेत नं निर्देशन बिउगु दु ।
अथे हे बैठकं थ्वहे वइगु कार्तिक ३ गते नेपाल संवत् ११३० या लसताय् तुच्चा ज्याझ्वः यायेगु नं क्वःछिउगु दु ।
