मभिंपिं नेतातय्सं न्ह्याग्गु नं यायेफु

डी. आर. खड्गी

झीगु जःलाखःला देय् चीन व भारतया राजनैतिक नेतातय्त अनया जनतां स्वइगु दृष्टिकोण यक्व हे पाः। चीनया नेतातय्त जनतां अति सम्मान व श्रद्धापूर्वक स्वयेगु यानाच्वनी। छाय्धाःसां देय् विकास यानाः जनताया आर्थिकस्तर क्वातुकाः देशय् शान्तिया वातावरण हयेगु ज्याय् अनया नेतातय्गु तःधंगु ल्हाः दु। उकिं उमित जनतां सकारात्मक दृष्टिं स्वयेगु याइ। चीनया नियम कानून नं कडा दु। नेतांनिसें कयाः सर्वसाधारण जनतां तक कानून उल्लंघन यायेत स्वइ मखु। यदि माल धाःसा नेतातय्त तकं कानूनं चिनाः कारवाही याइ। चीनया जनतां नेतातय्त ययेकाच्वंगुया कारण थ्व नं खः। नेतात सादा जीवन व उच्च बिचारयापिं जुयाच्वनी। नेतातय्के सामन्ति संस्कार खने मदु। उपिं बिलासी जीवन नं हने मसः। नेतातय्सं न्ह्याबलें नं देय् व जनताया कल्याण यायेगुबारे चिन्तन यानाच्वनी ।

उखे झीगु मेगु जःलाखःला भारतया जनतां धाःसा थःगु देशया नेतातय्त अति हे नकारात्मक दृष्टिं स्वयेगु यानाच्वनी। साधारण जनतां तक नेतातय्त बदमास, भ्रष्ट, खँ धकाः द्वपं बियाच्वनी। नेतात खन कि हे जनतां ख्वाः पाउँकेधुंकी। जनतां नेतातय्त घृणा व तिरष्कार याःगुया कारण नेतातय्गु बिलासी जीवन व राज्यया धुकू लुटे यायेगु प्रवृत्ति खः। जनताया धापू दु, नेतातय्सं भ्रष्टाचार यानाः कमिशन नयाः जनतायात दुःख कष्ट बियाच्वंगु दु। कांग्रेस पार्टीं आः नकतिनि हे सरकारयात कडा निर्देशन बिल - नेतातय्गु बिलासी जीवनयात नियन्त्रण या। धाः गथे अथे हे सरकारं २० प्रतिशत खर्च क्वपाला बिल। भारतय् थौंकन्हय् खर्च कटौतीया अभियान नेतातपाखें हे शुरु यानाच्वंगु दु ।

भारत विश्वय् प्रख्यात लोकतान्त्रिक देय् खः। भारतया विकासया लागिं स्वदेशी व विदेशी पूँजीपाखें यक्व योगदान यानाच्वंगु दु। भारत विकसित राष्ट्रया धलखय् च्वनेत सफल जुलं नं जनतां नेतातय्त स्वयेगु दृष्टिकोण धाःसा नकारात्मक हे तिनि। छाय्धाःसां अझ नं नेतात स्वच्छ, नैतिकवान, इमान्दार मजूनि। दृष्टिकोण दुपिनि न्ह्यःने इपिं लिउने हे लानाच्वंगु दनि। तर भारतया नेतात भ्रष्ट व बदमास धाःसां उमिसं राष्ट्रघाती ज्या धाःसा गबलें नं मयाः। अथे जूगुलिं भारतया आर्थिक स्थिति क्वातुयाच्वंगु खः। भारतीय नेतातय्त खुँ व बदमास जक धायेगु याः झीगु देया नेतातय्त थें राष्ट्रघाती धायेगु मयाः। झीगु देशय् ला नेतात जानाः राष्ट्रया धुकू हे स्वाहा यायेगु ज्या यानाच्वनी। उमित फताहा थ्व अर्थय् धाःगु खः, देय्या फुक्क नेतातय्गु ज्या जनतायात मूर्ख दयेकाः अनेक किसिमया फय्गं खँ ल्हायेगु जक खः। खस ब्रम्हू नेतातय्सं फय्गं खँ ल्हाल्हां आखिरय् थुपिं नं अवश्य हे उकिया शिकार मजुइ धाये मफु। गथे माकःचा जाल दयेकु दयेकुं अन्तिमय् थःगु जालय् थः हे क्यनाः थःगु जीवन फुका वनीगु खः, थ्व खस ब्रम्हूत नं छन्हु थःपिनिगु षडयन्त्रय् थःपिं हे क्यनीतिनि। खस ब्रम्हूतय्सं नेवाः नापं थीथी जनजाति, आदिवासीतय्त षडयन्त्रपूर्ण ढंगं माइनस यायां अधिकारविहीन यानाः शोषण यानाच्वंगु दु। आः वयाः खसब्रम्हुयात नं माइनस यानाः अधिकारबिहीन यायेत चांचां बिहार व यूपीया नागरिकत नेपाःया राजनीतिइ शक्तिशाली जुया वनाच्वंगु दु। अझ थ्व क्रम बढे जुयाः पुरा सरकार हे विदेशी मूलया नागरिकतय् ल्हातय् मवनी धाये मफु। भारतीय मूलया नागरिकत शक्तिशाली जुयाच्वंगु कारण भारत सरकारं समर्थन यानाच्वंगुलि खः। भारतया नेतातय्सं खुल्लारुपं हे धायेधुंकूगु दु, तराई कब्जा याकेगु लागि हतियारधारी पुचः व निःशस्त्र पुचः (पार्टी) तय्त ल्वाभः व नोट बियाः समर्थन व सहयोग यानाच्वनागु दु ।

ल्वाभःया बलं नेपाःमितय्त तराईपाखें बिस्थापित यायेत सफल जूगु दु। मेखे चुनाव मार्फत नं मधेशीवादी पार्टीं तराई कब्जा याकेत सफल जूगु दु। भारतीय मूलया ल्हातय् नेपाःया सत्ता कब्जा याकेगु उद्देश्यं हे थ्व जूगु खः। झीसं भारतयात जक दोष बीगु ठिक मजू। छाय्धाःसां भारतयात थःगु राष्ट्रिय स्वार्थ कथं रणनीति तयार यायेगु पूरा हक दु। झीसं दोष ला थनया खसब्रम्हू नेतातय्त बीमाः। उमिगु हे बेइमानीया कारणं यानाः थन भारतीयतय्सं म्हितेगु अवसर काये खनाच्वंगु खः ।

बैंकय् ध्यबा डिपोजिट याइगु धइगु हे थःत आवश्यक जुल कि लिकायेत खः। मोहनि नखः न्ह्यः बैंकय् कृत्रिम अभाव हयाबिल। नोटया संकट हःगु कारण खः कमिशन व भ्रष्टाचार। छाय्धाःसां राष्ट्र बैंकय् ९५ करोड त्रुटिपूर्ण नोट दु गुकियात छ्यले मजिउ यानातःगु खः। आःया अर्थमन्त्री, राष्ट्रिय योजना आयोगया उपाध्यक्ष, अर्थ मन्त्रालयया सचिव, राजस्व विभागया सचिव, महालेखाया हाकिमया मिलोमतों उगु त्रुटिपूर्ण नोट चले यानाः करोडौ कमिशन नल धकाः चर्चा जुयाच्वंगु दु। मेगु खतरनाक खेल खः नेपाली नोटया पलेसा भारतीय नोट राष्ट्र बैंकं हे बीगु। विश्वय् गनं हे त्रुटिपूर्ण नोट चले यायेगु वा राष्ट्र बैंकं हे विदेशी ध्यबा बीगु ज्या याइ मखु। नेपालय् धाःसा यात। अथे जूगुलिं जनतां सीके माल मभिंपिं नेतातय्सं देशघातक जुइगु न्ह्यागु ज्या नं याउँक हे यायेफु ।

More Stories Like this