अहिंसा दिवसय् माओवादी अध्यक्ष
नेपालय् नं न्यायेकूगु अहिंसा दिवसय् माओवादीया अध्यक्ष प्रचण्डं नं पाहांया रुपय् ब्वति काःगु घटनां माओवादी आः देय्या मूलधार धाःगुली धाथें हे लिहां वःगु खः लाकि धइगु संकेत बिउगु दु। माओवादीं देशय् झिदँ तक हिंसात्मक विद्रोह यानाः हानं शान्तिपूर्ण राजनीतिइ दुहां वःगु पार्टी खः। उकिं माओवादीयात मूलतः छगू हिंसाय् विश्वास याइगु पार्टीया हे रुपय् काइगु खः। तर माओवादी हिंसायात त्वःताः हानं शान्तिपूर्ण राजनीतिइ वःगु जक मखु व हे शान्तिपूर्ण लँपु जुयाः सत्ता तकं कब्जा यायेत सक्षम जूगु पार्टी खः। उकिं माओवादीया राजनीतियात छगू कथं हिंसा व अहिंसाया फ्युजन धकाः धाःसां जिउ ।
तर माओवादी अहिंसाया लँपुइ वल धकाः छक्वलं लय्तायेगु ई धाःसा शायद अझं मवःनि। छाय्धाःसां माओवादी अहिंसाया लँपुइ वःगुयात अझ नं मययेकीगु पार्टीत देशय् दनि। माओवादी अहिंसाया लँपुइ वःगुलिं थःपिनि राजनीति स्यन धकाः तायेकीपिं पार्टीत झीथाय् दनि। अय् जुयाः उमिसं हानं गय् यानाः जिउ माओवादीयात हानं जंगलपाखे हे छ्वये दःसा जिउ धकाः बिचाः यानाच्वंगु दनि ।
अज्याःपिंपाखें माओवादी नं उत्तेजित जुयाः जनतायात हानं बन्दूक हे ज्वंकेमाः धकाः न्ववाकेगु यानाच्वंगु दनि। जनता हानं जंगलय् दुहां वनेमाःगु अवस्था मवयेमा धकाः माओवादीं नागरिक सर्वोच्चताया खँ पित हयाच्वंगु दुसा मेमेगु पार्टीं धाःसा नागरिक सर्वोच्चतायात वेवास्ता यानाः नेतातय् सर्वोच्चता कायम यायेत स्वयाच्वंगु दु। देशय् तःधंगु बलिदान लिपा थौंया अवस्था वयाच्वंगु खः। यदि थ्व इलय् नं राज्यं जनतां यानाच्वंगु इच्छा पूवंकेगु ज्या मयात धाःसा हानं नं जनतां ल्वाभः मज्वनी धाये फइ मखु। आःया पालय् आदिवासी जनजातितय्सं ल्वाभः ज्वनीगु संकेत पिहां वयाच्वंगु दु। उकिं जनतायात हिंसाया लँपुइ यंकेगु लाकि अहिंसाया लँपुइ यंकेगु धइगु खँ जनतां स्वयां नं देशया राजनीतिं क्वःछीगु खँ खः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
