नेपाःयाः संगीत देश विदेशय् थ्यंकाच्वंम्ह बद्रीनारायण ताम्रकार

कृष्ण

बद्रीनारायण ताम्रकार ख्वपया छम्ह नांजाःम्ह संगीतकार खः। नेपालय् न्हापांखुसी मावि स्तरय् संगीत शिक्षा अध्यापन याकाः देशय् एसएलसी परीक्षाय् ख्वपया बासु उच्च माविपाखें एसएलसी तगिमय् संगीत शिक्षापाखें विद्यार्थीत उत्पादन यानादीगु वय्कःया विशेषता खः। रामगोविन्द ताम्रकार व मथुरा देवी ताम्रकारया काय बद्रीनारायण ताम्रकारं भारतया इहालावादपाखें संगीत प्रभाकर उपाधि प्राप्त यानाः देश विदेशय् संगीतया प्रचार प्रसार यानादीगु दु। नीदँ न्ह्यः थःगु हे पहलं विनाता कला सदन नांगु संगीत संस्था स्वनेधुंकल वय्कः पेशा कथं हे संगीतयात थःगु जीवनया मू अंग कथं ज्या लगे यानादीगु दु।
२०४५ सालय् न्हापांखुसी नेपालय् संगीत विषयय् एसएलसी बीगु ब्यवस्था यानाः ख्वपया बासु माविइ माविस्तरय् संगीत अध्यापन यानादीम्ह वय्कः थौकन्हय् नं देश विदेशय् संगीत ज्याझ्वः ज्वनाः वनेगु यानाच्वनादीगु दु। 'मतिनाया स्वां' नांगु थःगु संगीतय् तयार याःगु अनिता लोहलाया म्येँचाः नापं थीथी म्येँचाय् म्येँ हालेगु व संगीत तयेगु ज्याय् नं दुथ्याका च्वनादीम्ह वय्कः नेपालभाषा साहित्य तःमुँज्याया लागिं लसकुस म्येँ तयार यायेगु ज्याय् न्हापा च्यादँ झिदँ तक मदिक्क लगे जुयादीगु खःसा थुगुसी नं नेपालभाषा साहित्य तःमुँज्याया लागिं लसकुस म्येँ वय्कलं हे तयार यानादीगु खः। नापं वय्कलं थुगुसी हे जक नेवाः परम्परागत 'सितला माजुया म्येँ' वंगु सापारुं त्वाः त्वालय् प्रदर्शन यानाः क्यनादीगु खःसा उगु हे म्येँचाः भीसीडी कथं पिथनाः वंगु मोहनि ताकाय् बजारय् पित हयादीगु दु ।

अबु संगीत प्रवीण रामगोविन्द ताम्रकारपाखें न्हापांखुसी दबू प्याखनय् म्येँ हालेगु मौका बीवं बद्रीनारायण ताम्रकार थ्व लागाय् लाःवःगु खः। 'छेँया कं' नांगु २०३२ सालय् थःपिनि त्वालय् हे तयार याःगु दबू प्याखंपाखें थ्व लागाय् दुस्वः झाःम्ह संगीतकार ताम्रकार 'विश्वासघात' नांगु मेगु दबू प्याखनय् छम्ह कलाकार नापं गायक जुयाः न्ह्यःने वल । थम्हं हे म्येँ हाहां प्याखं हुलेगु ज्या यायां वयां लिपा 'प्रेम बलिदान' नांगु २०३५/३६ सालपाखे क्यंगु दबू प्याखनय् नं म्हितादीगु खः। उगु इलय् हे वय्कलं भोकल व हार्मोनियम नं नियमबद्ध रुपं सयेकादिल। थथे संगीत ख्यलय् थःगु रुची कथं एसएलसी लिपा वय्कलं ललितकला क्याम्पसय् संगीत बिषय कयाः अध्ययन यानादिल। वय्कलं तमल, कीबोर्ड, मादल, हार्मोनियम, ढोलक, कंगो, गितार नं थायेसः। वय्कःया मू विषय धाःसा भोकल (गायन) हे खः।
थौकन्हय् वय्कः होटेल ज्याझ्वलय् हे तसकं ब्यस्त जुयाच्वनादीगु दु। न्हापां न्यू हिमालचुली संगीत ग्रुपय् दुथ्यानाः वय्कः धिमे, तामाङ, भोजपुरी म्येँ नापं प्याखं ज्वनाः विदेशय् झाःगु खः। आः तक नीछगू देशया भ्रमणय् झाःम्ह वय्कः फ्रान्स, स्पेन, पोर्चुगल, जर्मन, बेल्जियम, भारत, डेनमार्क, स्वीडेन, हंगेरी, कतार, युनाइटेड अरब इमिरेट्स आदि देशय् थःगु संगीत प्रतिभा क्यनेज्या यानादीगु दु। नीन्यादँया थःगु संगीत जीवनय् वय्कलं आः तक झिंन्हय्द्वःम्ह कलाकार तयार यानादीपिं मध्ये गुलिं कलाकारपिंपाखें आः तक थःगु हे बायण्ड, ग्रुप, संस्था चायेकाः स्कूलय् कक्षा कयाः व होटेल प्रोग्रामत चले यानाच्वंगुलिं वय्कलं दां आपालं कमे याये मफुसां सन्तुष्टि धाःसा गाक्कं दुगु खँ कनादी ।

More Stories Like this