सहमतिया सतिक राजनीतिक दलत

राजनीतिक गतिरोध चीकेगु लागिं स्वंगू राजनीतिक पार्टीतय्सं न्ह्याकाच्वंगु संवाद अन्ततः सहमतिया सतिक थ्यंगु बांलाःगु समाचार वःगु दु। थ्व राजनीतिक गतिरोधया मुख्य घटक जुयाच्वंगु एनेकपा (माओवादीं) थःपिं जिक्व क्वमालि जुयाः सहमतिया लुखा चायेकेगु धाःगु कारणं समस्या याकनं ज्यनीगु खः लाकि धइगु आशाया जः खने दयावःगु खः। म्हीग माओवादीया अध्यक्ष प्रचण्डं आकाझाकां धइथें राष्ट्रपति डा. रामवरण यादवयात नापलासांनिसें राजनीतिइ हिउपाःया थ्व मोड वयेत्यंगु अनुमान थन यानाहःगु दु। खतुं राष्ट्रपति व प्रचण्ड दथुइ जूगु संवादया विवरण आः तक पिहां मवःनि, अथे खःसां उगु संवादं सहमतियात धाथें सतिका बिउगु खःसा उकियात च्वछाये हे माः ।

माओवादीं छुं ई न्ह्यः तक राष्ट्रपति यादवं राजीनामा हे बीमाः, प्रधानसेनापति प्रकरणय् वय्कलं ल्ह्वनादीगु पलाः गलत खः धकाः घोषणा हे जुइमाः धकाः माग यानाच्वंगु माओवादीं आः वयाः धाःसा संविधान हे संशोधन यानाः जूसां सेरेमोनियल राष्ट्रपतिया ज्या व अधिकार स्पष्ट यायेगु ज्या जुल धाःसां नं थःपिं सन्तुष्ट जुइ धयाहःगु दु। थथे यायेबलय् वर्तमान राष्ट्रपतिं राजीनामा बीमाःगु अवस्था जुइ मखु तर माओवादीं धयाच्वंगु नागरिक सर्वोच्चता स्थापना यायेगु ज्या धाःसा जुइ। जुजुयात चीकाः नागरिकं शासन यायेगु धकाः हःगु न्हूगु व्यवस्थाय् नागरिकया हे सर्वोच्चता कायम यायेगु ज्यायात मेपिं राजनीतिक दलतय्सं अस्वीकार याना च्वनेमाःगु आवश्यकता मदु। संविधान दयेकीपिं नागरिक खः उकिं नागरिकया सर्वोच्चतायात संविधानं पनातल धइगु तर्क पाय्छि मखु ।

More Stories Like this