स्वम्ह नेता छगू हे दबुली
शान्ति प्रक्रियायात निष्कर्षय् थ्यंकेगु बचं
येँ (सन्ध्या टाइम्स)/देशय् न्ह्यानाच्वंगु राजनीतिक गतिरोध चीकेगु कुतः जुयाच्वंगु इलय् स्वंगू प्रमुख पार्टीया स्वम्ह शीर्ष नेतात थौं छगू हे दबुली खनेदत ।
विश्व अहिंसा दिवसया लसताय् तक्षशिला एकेडेमीं ग्वसाः ग्वःगु ज्याझ्वःया दबुली नेपाली कांग्रेसया सभापति गिरिजाप्रसाद कोइराला, माओवादी अध्यक्ष पुष्पकमल दाहाल 'प्रचण्ड' व एमालेया अध्यक्ष झलनाथ खनालं संवोधन यानादीगु खः ।
ज्याझ्वलय् स्वम्हं हे नेतातय्सं नेपालय् न्ह्यानाच्वंगु शान्ति प्रक्रियायात तार्किक निष्कर्षय् थ्यंकेगु निंतिं सहमतिइ बः बियादीगु खः ।
ज्याझ्वलय् न्ववायेगु झ्वलय् कांग्रेस सभापति कोइरालां हिंसाया राजनीति त्वःताः अहिंसाया राजनीतिइ वःगुलिं माओवादी अध्यक्ष प्रचण्डयात आभार प्वंकादीगु खः। वय्कलं प्रचण्डपाखें क्यनादिसें अपाय्धंगु हिंसा यानाः नं बन्दुक थन्के यानाः वय्कः शान्तिया लँपुइ झाल धयादिसें गान्धीया लँपु ज्वनाः झी सकलें मिले जुयाः न्ह्याः वने नु धयादिल ।
ज्याझ्वलय् माओवादी अध्यक्ष प्रचण्डं शान्ति प्रक्रियाया सफलताया निंतिं दलतय् दथुइ सहमति व राष्ट्र संघ व जःलाखःला देय्या निरन्तर ग्वाहालि आवश्यकता दुगु बिचाः प्वंकादिल ।
वय्कलं छुं दलं अन्तरिम संविधान व शान्ति सम्झौताया अःखः व्यवहार क्यनाच्वंगु व जनमतयात क्वत्यलाः तानाशाही व अप्रजातान्त्रिक व्यवस्था वये फइगु खतरा दुगु बिचाः नं प्वंकादिल। लिसें वय्कलं हिंसा मदिउतले न्हूगु संविधान नं दयेके मफइगु बिचाः प्वंकादिल ।
अथे हे न्ववायेगु झ्वलय् एमाले अध्यक्ष झलनाथ खनालं दलत मिले जुयाः न्ह्याः वनेगु विकल्प मदु धासें शान्ति प्रक्रिया व संविधान दयेकेगु ज्यायात पूर्णता बीत माओवादी गम्भीर जुइमाःगु बिचाः प्वंकादिल ।
संयुक्त राष्ट्र संघं सन् २००७ य् अहिंसाया अनुयायी महात्मा गान्धीया जन्मन्हि कुन्हु अन्तर्राष्ट्रिय अहिंसा दिवसया घोषणा याःगु खः ।
थौं हे महेन्द्रनारायण निधि प्रतिष्ठानपाखे येँय् अहिंसा सम्बन्धी अन्तर्राष्ट्रिय सम्मेलन यायेगु ग्वसाः ग्वयातःगु दु। उगु सम्मेलनय् भारतया कांग्रेस आई पार्टीया महासचिव जनार्दन द्विवेदीं ब्वति कयादी। सम्मेलन प्रधानमन्त्री माधव नेपालं उलेज्या यानादी ।
