चाइनिज राजदूतया प्रशंसा व कमरेड प्रचण्डया कसरत

नर्मदेश्वर प्रधान

कवि द्धारिका श्रेष्ठया छेँ । चाइनिज राजदूत वइगु ज्याझ्वः । इनाप यात । वना । थ्वया न्ह्यः चाइनाया दूतावासया प्रथम सचिव व निम्ह चाइनिज भाष विज्ञत अन वःगु । उमिसं चाइनाया कविता ब्वंगु । जि लुमं । जलाखला देय् चाइनाया साहित्य बारे झीके ज्ञां म्हो । ब्वनेगु अवसर मदु । झिसं जलाखला देय्या साहित्य कला बारे नं सीका वनेमाः । परस्परय् अन्र्तकि्रया दया च्वनेमाः । चाइनिज राजदूतलिसें सामान्य परिचय ज्याझ्वः जुल । अले राजदूतं न्ववाना दिल । चाइनिज भाषां न्ववाना वात । उकिया अंगे्रजी भाषां अनुवाद दोभाषी यात ।

चाइनिज राजदूतं उबलय् साहित्य बारे हे खँ ल्हात । राजनीति विषया खँ न्ह्यमथं । वय्कलं तःहाकः हे न्ववात । वय्कःया न्वचु न्यनाः छताखँय् अजूचाल । उखुन्हु राजदूतं माओया नां तःक्वः काल । माओयाकविता बारे चर्चायात । चाइनां माओयात ल्वःमंके धुंकल वैगु नां उमिसं न्ह्यथनी मखुत । माओवा युग चाइनाया अन्त जुइ धुंकल । माओ पुलां बाखं जुइ धुंकल । थौं मनूत थ्व निष्कर्षय् वइ । तर उकुन्हु चाइनिज राजदूतया भाषण पाः गजव जुल । वं माओया नां तःक्वः काल । प्रशंसाया रुपय् । कवि विमल ुनिभाु नं चाइनिज राजदूतया माओ पे्रम खनाः आश्यर्य चकित जुल । वय्कलं थःगु आश्चर्य लिसा लिसा कयाः प्वंकाच्वन । राजदूतं माओया नां काःगुया राजनीतिक कूटनैतिक अर्थ छु जिं मसिउ । व खँय् जिं छ्यं मच्वला । थःम्हं न्ह्याये मदुगु विषय । कपाः स्याका मच्वना ।

शायद नेपालय् माओवादी वःगुलि खःला । चाइनिज राजदूतं भाषणय् माओया नां बारम्बार काःगु । खँया विश्लेषण जुइ । झीथाय् देशय् ससम्मान माओया नां छुनाः पार्टी चायेकी । माओया नांया लिधंसाय् संघर्ष जुइ । विजय प्राप्त याइ । चाइनाय् माओं ल्वःमंकूसा झीथाय् माओया नां ताजा जुइ । माओवादी शक्ति जुयाः प्रकट जुइ । चाइनाय् शिथिल जूसां नेपालय् माओया नां च्याइ । जनतां माओया नामं छुं जुइगु । आशा याइ । माओ नामं सकसितं थी । माओया नामं हे मनूतय् नुगलय् क्रान्ति साचारीत जुइ । तर थौंकन्हय् कमरेड प्रचण्डं थःगु पार्टीया नां माओवादी मतयेगु बिचाः प्वंकूगु दु । थ्व खँय् थः निदँ न्ह्यःनिसें प्रयासरत जुयागु खँ मेडियाय् कनी ।

उखुन्हु तिनि चाइनिज राजदूतं बारम्बार माओया नां कयाः न्वचु बिउगु । उबलय् मती च्वनी । चाइनाय् माओवाद हानं पुर्नजीवित जुइन जुइमाः । नेपाःया माओवादीत चाइनिज राजदूतया माओ प्रतिया सद्भावनां जरुर उत्साहित जुइ । जिं बिचाः यानाः । माओवादी सरकारय् वसेनीं कूतनीति कथं चिनिया राजदूत माओया प्रसंशक जूगु खःला अनुमान जुइ ।

तर आश्चर्य खँ मेखतं न्ह्याइ । छखे माओयात चाइनिज राजदूतं हानं लुमंकूगु अनुभव याइ । मेखे माओवादी स्वयम् माओया नांयात तिलाञ्जली बीगु बुखँ ब्वने । गहन राजनीतिक विषय सामान्य नागरिकतसें । अःपुक थुइके मफइगु स्वाभाविक खः ।जिं नं छम्ह सामान्य नागरिक । जिं नं देशया राजनीतियात बांलाक मथू । थुइके मफु ।

माओवादी पार्टीं । सिद्धान्तय् आधारित पार्टी धाइ । सिद्धान्तया कारणं हे गांया लाखौं मनूतय्सं थ्वं याःगु संघर्षया आह्वानय् ब्वती काःगु धाइ । जनतां थुकथं माओवादी निश्चित सिद्धान्त दुगु पार्टी खः । तर थौंकन्हय् जनता थ्व विश्वासय् अलमलय् जुइगु परिस्थिति लुयाच्वंगु दु । अमेरिकाय् डा। बाबुराम भट्टराइ नं नेपालय् साम्यवाद विषय पाःगु बिचाः प्वंकूगु दु । ठीक वेठीक क्वःछी त्यनागु मखु । तर सामान्य मनूतय्सं थज्याःगु विरोधाभाशपूर्ण अन्तरविरोधी खँत गय् थुइकेगु जिज्ञाशा प्वंकाःगु खः ।

एमालें नं छक्वः थःगु नां व ध्वाँय् हीकेगु खँ न्ह्याकूगु खः । गुलिखे कट्टर साम्यवादीतय्सं एमालेया उदारतायात कयाः नक्कली साम्यवादी पार्टी नं धाः । एमालेया पार्टी अफिसय् उबले छकः अमेरिकी राजदूत वःबलय् माक्स्र लेनिनपिनि किपा चीकल धाःगु न्यनागु दु । थज्याःगु खँ माओवादी पार्टीं एमालेया साम्यवादी पार्टी धकाः स्वीकार मयाः । थौं माओवादी पार्टीं माओया नां हीका छ्वयेगु खँ पित हइ । थुकिया औचित्य नेतातय्सं न्ह्यब्वइ । जनताया ज्या छ्यं संकेगु खः । लुमना च्वनी चाइनिज राजदूतया नं माओया प्रशंसा । मेखेर कमरेड प्रचण्डया माओया नां हिलेगु कसरत ।

More Stories Like this