हेटौंडाय् हुला प्याखं

नीन्याम्ह मय्जुपिं न्हिंन्हिं पल्पसा हलया ख्यलय् थ्यनी। अले अन थाकातःगु बाजंया तालय् तुति, ल्हाः, छ्यं व म्ह संकेगु शुरु याइ। वंगु लछि न्ह्यवंनिसें न्ह्यानाच्वंगु उमिगु थ्व दिनचर्या उकुन्हु मोहनि न्ह्यः तिनि क्वचाल ।

थ्व नीन्याम्ह मय्जुपिं हेटौंडाया नेवाः सांस्कृतिक पुचःपाखें न्ह्याकूगु नेवाः हुलाप्याखंया प्रशिक्षण कयाच्वंपिं खः। सांस्कृतिक पुचःपाखें हेटौंडाय् नेवाः संस्कृतियात हानं म्वाकेगु ताः तयाः गबलें धिमेसा गबलें खिं थायेगु प्रशिक्षण न्ह्याका वयाच्वंगु दु। थुगुसी हुलाप्याखंया प्रशिक्षण बिल। खतुं छुं दँ न्ह्यः नं हुलाप्याखंया थज्याःगु छगू प्रशिक्षण क्वचायेके धुंकूगु दु। थुगुसी जूगु निक्वःगु प्रशिक्षण खः।
प्रशिक्षण बीत मध्यपुर कला परिषद् थिमिया प्याखं गुरु विजय प्रजापति हेटौंडा झाया च्वनादीगु दु। उगु प्रशिक्षणजःछि वय्कलं लाखे प्याखं, महाकाली प्याखं, ज्यापुज्यापुनी प्याखं आदि स्यनादीगु खः ।

पुचःया सल्लाहकार सुनकुमार मानन्धरया संयोजकत्वय् थ्व प्रशिक्षण न्ह्यानाच्वंगु खः। भाजु मानन्धर थः हे नं नेवाः बाजं थायेसःपिं हेटौंडाया म्होचा जक मनूत मध्ये छम्ह खः।
थज्याःगु प्रशिक्षणं हेटौंडाय् नेवाः संस्कृतियात पुनरुत्थान यायेत तःधंगु तिबः बीगु खँ सांकृतिक पुचःया कार्यवाहक नायः मोहनमान सांगामीं कनादी। हेटौंडाय् दँय् छगू निगू जक थज्याःगु ज्याझ्वः याये फःसां अन नेवाः भावना थनेत तिबः जुइगु वय्कःया बिचाः दु। 'तर थुकिया निंतिं जिल्लाया सकलें नेवाःतय् ग्वाहालि व तिबः मदयेक धाःसा मगाः,' वय्कलं धयादी ।

उगु प्रशिक्षणपाखें प्याखं हुइ सयेकूपिं सकलें प्रशिक्षार्थीतय्त हेटौंडाय् छगू सार्वजनिक ज्याझ्वः यासें पित हयेगु ग्वसाः दयेकातःगु दु। हेटौंडाय् नेवाः सांस्कृतिक ज्या-वःत अपाय्च्वः मजू। अथे खःसां सापारु, कृष्णाष्टमि आदि थेंज्याःगु इलय् धाःसा अन नेवाः बाजं व सांस्कृतिक झाँकीत पिहां वः। थन प्याखं हुइ सयेकूपिंसं अबलय् थःपिनि प्रतिभा क्यने खनी ।

More Stories Like this