चर्चय् जूगु तःधंगु दुर्घटना

धरानया छगू चर्चय् दुर्घटना जुयाः नीन्याम्ह मनू सीगु दुःखद् समाचार वःगु दु। मोहनिया इलय् सकस्यां न्ह्यइपुकाच्वंबलय् इसाई धर्मया छगू सम्मेलन जुयाच्वंथाय् टहरा दुना वयाः उगु घटना जूगु जुयाच्वन। गुकिं यानाः चान्हय् द्यनाच्वंपिं नीन्याम्हमछि मनूत सीत। उकी लानाः प्यम्ह नाबालक मस्त नं सीगु जुयाच्वन ।

थनिं न्यादँ न्ह्यः थथे हे मोहनिया इलय् हे ताप्लेजुङया घुंसा धाःगु थासय् हे हेलिकप्टर दुर्घटना जुयाः देय्या तसकं नांजाःपिं संरक्षणविद्पिं लगायत २४ म्ह मनूत सीगु खः। आः नं मोहनिया इलय् हे थज्याःगु दुर्घटनाया समाचार न्यनेमालाः सकलें नेपाःमितय् नुगः काइँया मिना वःगु दु।
घटना जूथाय् कमजोर प्रकृतिया अस्थायी टहरा दनातःगु व अन क्षमता स्वयां अप्वः मनूत च्वंगु कारणं हे दुना वःगु प्रारम्भिक रिपोर्ट वःगु दु। क्षमता स्वयां अप्वः मनू तःगु ला ग्वसाः खलःया हे लापर्वाही खः। लिसें अस्थायी टहरा दयेकूबलय् नं छुं कमजोरी जूगु दु ला व नं सीकेमाःगु आवश्यकता दु। दुर्घटनाय् लानाः सीपिं व घाःपाः जूपिं सकलें छगू धार्मिक ज्याय् वयाच्वंपिं खः। वय्कःपिं संसारया हे कल्याण जुइमा धइगु कामना सहित अन वयाच्वंगु खः, तर विडम्बना उपिं हे अनाहक मृत्युया शिकार जुइ माल।
मदुपिं मनूतय् छेँजः व घाःपाः जूपिंत ग्वसाः खलः व राज्यपाखें नं फुगु ग्वाहालि यायेमाःगु आवश्यकता दु। लिसें घटनाया छानबिन यानाः लिपा लिपा थज्याःगु घटना मजुइकेगु उपाय बारे पलाः छीमाःगु आवश्यकता दु। थ्व दुःखद घटनां मुक्कं देय्यात हे स्तब्ध याना बिउगु दु ।

More Stories Like this