प्रहरी-जनता गोली हानाहान

छम्ह प्रहरी नापं स्वम्ह स्थानीय मनू सित

येँ (सन्ध्या टाइम्स)/पर्साया औरहा बकवापिपराय् थौं सुथय् सशस्त्र प्रहरी व स्थानीय वासिन्दाया दथुइ जूगु ल्वापुइ लानाः छम्ह प्रहरी व स्वम्ह स्थानीय मनू सीगु दु ।

स्थानीय मनूतय् छेँय् गजि तयातःगु दु धकाः सशस्त्र प्रहरीं उमिगु छेँय् तलाशी कायेगु कुतः यायेवं विवाद जुयाः निगू पुचःया दथुइ ल्वापु जूगु खः ।

प्रहरीं बिउगु जानकारी कथं गजि तस्करीया सुराकी वःगुलिं छापा मारे याः वंपिं सशस्त्र प्रहरी व स्थानीय जनताया दथुइ विवाद जूगु खः। विवाद लिपा सहलह यायेगु धकाः ब्वना यंकूपिं प्रहरीतय्त अनया हे जनमुखी क्लबय् कुनाः पिनें गोलीं कयेकेवं प्रहरीं नं जवाफी गोली प्रहार याःगु खः। प्रहरीया उगु गोली प्रहारय् लानाः स्वम्ह स्थानीय मनू सीगु खँ प्रहरीं धाःगु दु ।

प्रहरी व स्थानीय जनताया दथुइ जूगु ल्वापुइ लानाः छम्ह प्रहरी नं सीगु दु। उम्ह प्रहरीयात स्थानीय जनतां दायाः स्याःगु खँ धाःगु दु। वयागु नां व थाय्बाय् धाःसा सी मदुनि।
प्रहरीया गोलीं कयाः सीपिं सर्वसाधारण मनूत छोटे साह कानु, चयना कानु व राजकुमार पटेल खः ।

घटना लिपा स्थिति नियन्त्रणय् हयेत घटनास्थलय् थप प्रहरी परिचालन यानाः मुक्कं उगु लागायात हे प्रहरीं घेराबन्दी यानातःगु दु। घटनास्थलया १ किलोमिटर जःखः सुयातं छ्वयाच्वंगु मदु ।

उखे स्थानीय जनतां धाःसा प्रहरी विरुद्ध नारावाजी यासें पिहां वयाः प्रदर्शन यानाच्वंगु दु ।

प्रहरीया गोलीं कयाः सीपिनि लाश जनमुखी क्लबया न्ह्यःने अथें लानाच्वंगु दनि। स्थानीय मनूतय्सं लाश उठे मयासे तयातःगु खः ।

प्रहरीं घटनाय् सीपिं फुक्कं गजि तस्करीया ज्याय् संलग्न जूपिं धकाः द्वपं बियाच्वंगु दुसा स्थानीय जनतां धाःसा उपिं गांया सर्वसाधारण जनता खः धाःगु दु ।

अथे हे प्रहरीं स्थानीय जनतां थःपिंत गोलीं कयेकेधुंकाः जक थःपिंसं नं गोली चले यानागु खँ धाःगु दु ।

घटनाय् लानाः घाःपाः जूपिं मध्ये निम्हेसिया अवस्था गम्भीर जुयाच्वंगु दु। घाःपाः जूपिं फुकसित नारायणी उपक्षेत्रीय अस्पताल वीरगञ्जय् वासः याकातःगु दु।
उखे अछामय् नं अस्थायी प्रहरी ज्याकुथी च्वनाच्वंपिं प्रहरीयात स्थानीय जनतां आक्रमण यायेवं झिम्ह प्रहरी घाःपाः जूगु दु। अछामया ढकनी गाविसय् जुयाच्वंगु मेलाय् अय्लाः थ्वँ पनेमाःगु खँय् विवाद जुयाः स्थानीय वासिन्दां प्रहरी चौकीइ आक्रमण याःगु खः। घाःपाः जूपिं प्रहरीतय्त सदरमुकाम हःगु दु ।