सेना समायोजनय् सहमति
कांग्रेसं प्रतिशोध कथं पंगः थनाच्वंगु द्वपं
नेपाली सेना व माओवादी सेना समायोजन यायेत एमाले व माओवादी सहमत जूगु दु । उकिया निंतिं सरकारं याकनं हे सेना समायोजन बारे छगू समिति दयेकेगु खँय् नं थ्व निगू दल सहमत जूगु दु ।
थौं सुथय् एमालेया छथ्वः केन्द्रीत नेतात व माओवादी अध्यक्ष एवं प्रधानमन्त्री पुष्पकमल दाहाल दथुइ वालुवाटारय् च्वंगु बैठकय् थ्व सहमति जूगु खः । सरकारं दयेकीगु उगु समितिइ प्रतिपक्षी दलया नेता व सुरक्षा निकायया पदाधिकारीत नं दुथ्याकेगु सहमति जूगु दु ।
थौंया बैठकय् सरकार संचालनया निंतिं दयेकेगु धाःगु उच्चस्तरीय राजनीतिक संयन्त्रयात कयाः नं सहलह जूगु खः । उगु संयन्त्रय् एमालेया पुलांम्ह महासचिव माधवकुमार नेपालयात अध्यक्ष दयेकेगु सहमति जुइधुंकूगु दुसा थुगु संयन्त्रयात थौं हे पूर्णता बीगु कुतः नं जुयाच्वंगु दु ।
थौं प्रधानमन्त्री प्रचण्डं सरकारय् दुथ्याःगु मधेशी जनअधिकार फोरम जनमोचर्ँ नेपाल व सद्भावना पार्टीलिसे नं सहलह ब्याकादीगु ग्वसाः दयेकातःगु दु । म्हिगः प्रम प्रचण्डं एमाले महासचिव झलनाथ खनाल व नेपाली कांग्रेसया सभापति गिरिजाप्रसाद कोइरालायात नापलानाः नं थुकिया बारे सहलह यानादीगु खः ।
अथे हे प्रम प्रचण्डं थौं नेपाःया निंतिं अमेरिकी राजदूत नान्सी जे। पावेल व चिनिया राजदूततलिसे नं नापलानादीगु ग्वसाः दु ।
उखे शान्ति मन्त्री जनार्दन शर्मां तराई लागाय् सशस्त्र आन्दोलन यानाच्वंगु पुचःलिसे अनौपचारिक रुपं खँल्हाबल्हा जुयाच्वंगु खँ कनादीगु दु । एमाले लिसेया खँल्हाबल्हा लिपा पत्रकारतलिसे खँ ल्हासें वय्कलं उगु खँ कनादीगु खः । वय्कलं छन्हु निन्हुया दुने हे सशस्त्र पुचःत लिसे औपचारिक वार्ता जुइगु खँ नं कनादीगु दु ।
उखे रक्षामन्त्री रामबहादुर थापा बादलं नेपाली कांग्रेसं प्रतिशोधपूर्ण रुपं अनमिनयात विवादय् सालाच्वंगु द्वपं बियादीगु दु । थौं सुथय् चितवनय् जनयुद्धया झ्वलय् सहिद जूपिनि नामय् दयेकूगु सहिद स्मृति सभागृहया उलेज्या यासें वय्कलं उगु द्वपं बियादीगु खः । अन न्ववासें वय्कलं न्हापा कांग्रेस सरकारय् दुगु इलय् जूगु सहमतियात थौं वयाः कांग्रेसं हे उल्लंघन यानाच्वंगु द्वपं नं बियादीगु दु । सेना समायोजन याकनं जुइ धकाः दावी यानादीसां वय्कलं तर गबलय् जुइ धइगु विषयय् धाःसा छुं कनामदी ।
