चर्च दुर्घटनाय् २३ म्ह सित

सीपिं मध्ये प्यम्ह मस्त / मेपिं ६४ घाःपाः

येँ(सन्ध्या टाइम्स)/धरानया भिक्टोरिया चोकय् च्वंगु छगू चर्चय् दुर्घटना जुयाः २३ म्ह मनू सीगु दु। सीपिं मध्ये प्यम्ह मस्त खः। उकी लानाः मेपिं ६४ म्ह घाःपाः जूगु दु।
वंगु असोज १२ गते निसें न्ह्याःगु अन्तर्राष्ट्रिय पवित्र सम्मेलनया निंतिं दयेकातःगु नितँजाःगु अस्थायी टहरा दुनाः उगु दुर्घटना जूगु खः। म्हिगः बहनी ११ बजेपाखे उगु टहरा दुना वःगु खः ।

दुर्घटनाय् लानाः घाःपाः जूपिं ६४ म्हेसित धरानय् च्वंगु वीपी कोइराला स्वास्थ्य विज्ञान प्रतिष्ठानय् वासः याकातःगु दु।
सम्मेलनय् नेपाः व भारतया यानाः निद्वः स्वयां अप्वः मनूतय्सं ब्वति कयाच्वंगु खः।

पंया टहराय् झिंन्यासः स्वयां अप्वः मनूत च्वनाच्वंगुलिं थ्व दुर्घटना जूगु प्रारम्भिक अनुमान प्रहरीं याःगु दु। दुर्घटना जुइवं स्थानीय जनता, प्रहरी व सेनाया जवानतय्सं उद्धार याःगु खः। सीपिं सकसियां सनाखत जुइधुंकूगु खँ प्रहरीं धाःगु दु ।

घटनायात कयाः प्रधानमन्त्री माधव नेपालं थौं छगू प्रेस विज्ञप्ति पिथँसें दुःख प्वंकादीगु दु। विज्ञप्तिइ मदुपिनि आत्माया चीर शान्तिया कामना यासें उमि छेँजःयात धैर्य धारण याये फयेमा धकाः बिचाः हायेका तःगु दु। अथे हे घाःपाः जूपिं सकसियां याकनं स्वास्थ्य लाभ जुइमा धकाः नं विज्ञप्तिइ कामना यानातःगु दु ।

थ्वहे झ्वलय् घटना बारे जानकारी कायेत गृहमन्त्री भीम रावल थौं धरान थ्यंकः वंगु दु। वय्कलं घटनास्थलय् घाःपाः जूपिं व सुरक्षा प्रमुखत नापलानादीगु ग्वसाः दु ।

सीपिनि धलः

४५ दँया नन्दाकिशोरी लिम्बु, ४० दँया सरोजा लिम्बु, आशा राई, सरिता दियाली, इकोला लिम्बु, दिलमाया ल्वागुन, राजेश राई, शान्ति तामाङ, अभिशेष राई, पवित्रा लिम्बु, गोमा भुजेल, आटीमाया राई, मर्सी मेचे, सुलेमान तामाङ, नन्दीमाया विक, भारतया निरु राई, राजेश राई, कलावती खौसियार, किशन चौधरी, कुमारी तामाङ, पुनम मगर, पिटर लावती व कल्पना थलामी ।