आखिर मोहनि लिपा स्थिति झन हे स्यन

मोहनिजःछि नं वार्ता व बैठक च्वनाः देशय् कायम जुयाच्वंगु गतिरोध चीकेगु धकाः नेतातय्सं याःगु घोषणा अन्ततः विफल जूगु दु। खास यानाः सत्तारुढ पार्टीत एमाले, कांग्रेस व विपक्षी माओवादीया नेतातय्सं मोहनि हे मधासे थवंथः वार्ता यानाः गतिरोध चीकेगु ज्या याये धाःगु खः। तर मोहनि सिधःसां गतिरोध धाःसा कायम हे दनि। थुकिं यानाः नेपाःया राजनीतिक पार्टीत संवाद, सहमति व सहकार्यया ज्याय् हानं छक्वः विफल जुल धकाः क्यना बिउगु दु ।

थ्व झ्वलय् म्हिगः मोहनि सिधयेसातकि च्वंगु माओवादीया बैठकं प्रधानसेनापति प्रकरणय् राष्ट्रपतिं ल्ह्वंगु पलाः गैरसंवैधानिक हे खः धइगु थःपिनि अडानय् कायम हे याना तयेगु धकाः निर्णय याःगु दु। माओवादीया थ्व निर्णयं देशय् कायम जुयाच्वंगु राजनीतिक अन्यौल कायम जुयाच्वनीगु जक मखु अझ तच्वयेका बीगु संकेत बिउगु दु। थुकिं मोहनि लिपा ज्यनी धाःगु समस्यायात अझ जटिल याना बीगु खनेदु। माओवादीं यदि राजनीतिक अन्यौल कायम जुयाच्वन व उकियात संवादपाखें ज्यंके मफुत धाःसा स्वन्ति लिपा तःधंगु आन्दोलन यायेगु जुइ धकाः ज्याझ्वः हे घोषणा याना तयेधुंकूगु दु। माओवादीयात अज्याःगु कडा ज्याझ्वः मयाकेगु लागिं सत्तारुढ पार्टीतय्सं पहल म्हितेमाःगु खः। तर विपक्षी सिबें सत्तारुढ पार्टीत हे अप्वः कडा जुयाः अडानय् च्वनाच्वंगु कारणं समस्या ज्यनेगुपाखे सिबें नं जटिल जुइगुपाखे तीव्र गतिं ब्वाँय् वनाच्वंगु दु। माओवादीं आः न्ह्याकीगु तःधंगु आन्दोलनं देश हानं छक्वः डाँवाडोल जुइगु निश्चित दु। उकिं मुलुकया हितय् मदुगु अडान पार्टीतय्सं त्वःते हे माःगु खनेदु ।

More Stories Like this