ब्रसेल्सय् हन सिद्धिदासया बुदिं

पासा पुचः बेल्जियमया ग्वसालय् ब्रसेल्सय् छगू ज्याझ्वःया दथुइ नेपालभाषाया महाकवि सिद्धिदास महाजुया १४२ क्वःगु बुदिं हंगु दु । वंगु आइतवाः जूगु ज्याझ्वलय् कविता गोष्ठी नं जूगु खः ।

ज्याझ्वलय् मू पाहां अन्तर्राष्ट्रिय नेपाली साहित्य समाज (अनेसास) या महासचिव कृष्ण बजगाइं महाकविया सुधारवादी व्यक्तित्वया बारे न्ववानादिसें महाकविया बुदिं हनेगु बांलाःगु सुरवात जूगु न्ह्यथनादिल । ज्याझ्वःया अतिथि एन आर एन बेल्जियम अध्यक्ष पि.जी. शेर्पां महाकविया कृति मेमेगु भाषां अनुवाद यायेमाःगु खँय् बः बियादिल । एन आर एन आइसिसि सदस्य रविन्द्रमान श्रेष्ठं नेपालभाषा थःहे तःमिगु भाय् जूगुलिं थुकिया उत्थान यायेमाःगु खँ कुलादिल ।

पासा पुचः बेल्जियमया नकिं रजनी प्रधानया सभापतित्वय् जूगु उगु ज्याझ्वलय् अर्जुन कुमार श्रेष्ठ, सुरेन्द्रमान श्रेष्ठ लगायतया वक्तापिन्सं महाकवि महाजुया साहित्यिक योगदानया बारे न्ववानादीगु खः । लिसें रुपेन्द्र श्रेष्ठ, डा. बालगोपाल श्रेष्ठ, छत्रबहादुर कायष्ठ, युवराज गुरुंग व मेमेपिनिगु कविता रुक्मणी अमात्य, तक्दिर महर्जन, अनुप श्रेष्ठ, रजनी प्रधानपिन्सं वाचन यानाः न्यंकादीगु खः ।

More Stories Like this