समस्या ज्यंकेत एमाले पहल
थौं माओवादी व कांग्रेसलिसे अलग अलग वार्ता
येँ (सन्ध्या टाइम्स)/देशय् कायम जुयाच्वंगु राजनीतिक अन्यौल मदयेकेगु लागिं एमालेपाखें पहल शुरु याःगु दु। सकलें राजनीतिक पार्टीत थःथःगु अडानय् च्वनाच्वंगु व उकिं यानाः संविधान च्वयेगु ज्या समेत प्रभावित जूवंगुलिं थ्व गतिरोध मदयेकेगु लागिं धकाः एमालें हानं छक्वः थ्व पहल शुरु याःगु खः ।
राजनीतिक गतिरोध मदयेकेगु लागिं एमालें स्थायी समितिया दुजः भरतमोहन अधिकारीया अध्यक्षताय्. उकुन्हु गठन याःगु उच्चस्तरीय वार्ता समितिपाखें थ्व पहल न्ह्याकूगु खःसा थ्व झ्वलय् थौं एनेकपा (माओवादी) लिसे न्हापांगु चरणया वार्ता याःगु दु। एमाले ज्याकू बल्खुइ जूगु उगु वार्ताय् माओवादीया उपाध्यक्ष नारायणकाजी श्रेष्ठ व केन्द्रीय दुजः कृष्ण बहादुर महरां ब्वति काःगु खः ।
राजनीतिक पार्टीतय्सं तयाच्वंगु अडान त्वाःथलाः न्हूगु दिशापाखे न्ह्यायेगु लागिं वार्ता फलदायी जूगु खँ निगुलिं पार्टीया नेतातय्सं धाःगु दु ।
थ्व धुंकाः आः नेपाली कांग्रेसलिसे नं एमाले समितिं वार्ता यायेत्यंगु दु। थौं नेकां संसदीय दलया नेता रामचन्द्र पौडेलया छेँय् थ्व वार्ता जुइगु खँ धाःगु दु। एमालें सकलें पार्टीयात मिले जूगु दथुया लाइन ज्वनाः वनेमाःगु बिचाः तयाच्वंगु दु।
मोहनि ढुक्कं हनादिसँ : प्रचण्ड
म्हिगः छगू निजी मोबाइल कम्पनीया उलेज्या यासें स्वम्ह नेतातय् दथुइ जूगु कन्फरेन्स बैठकपाखें देय्न्यंकं अतिकं बांलाःगु सन्देश वंगु खँ माओवादी अध्यक्ष प्रचण्डं धयादीगु दु ।
म्हिगः हेल्लो नेपाल मोबाइलया उलेज्या यासें येँय् च्वंम्ह नेकां सभापति गिरिजाप्रसाद कोइराला, रोल्पाय् च्वंम्ह माओवादी अध्यक्ष प्रचण्ड व दांगय् च्वंम्ह एमाले महासचिव ईश्वर पोखरेल दथुइ कन्फरेन्स वार्ता जूगु खः। उगु इलय् नेकां सभापति कोइरालां नेपाःया समस्या झी नेपाःमि हे जक जानाः समाधान याये नु धकाः न्ववानादीगु खँ अतिकं महत्वपूर्ण खः धासें थुकिं याकनं हे थःपिनि गतिरोध चिला वनीगु आशा याये फइगु खँ नं प्रचण्डं कनादिल ।
रोल्पा लिपा थौं दांगय् थ्यनाच्वंम्ह भाजु प्रचण्डं पत्रकारतलिसे खँ ल्हासें धयादिल, 'म्हिगःया वार्ता अतिकं अर्थपूर्ण जूगु दु। थुकिं सकलें नेपाःमियात न्ह्यःने वयाच्वंगु मोहनि नखः ढुक्क जुयाः हंसां जिउ धइगु सन्देश प्रवाह याःगु दु ।'
