थुगुसीया म्हाइपुगु मोहनि नखः

दँय्दसं थें थुगुसीया मोहनि नं थ्यंकः वल। तर थुगुसीया मोहनि नेपाःमितय्सं न्हापा स्वयां थाकुक, कष्टकर जुइक व गबलें ल्वःममनी कथं हनेमाःगु अवस्था न्ह्यःने दु। छाय्धाःसां थुगुसी देशय् बजाःभाः थुलि अस्वाभाविक रुपं थहां वन कि थुकिं मोहनि न्ह्यइपुक हने धकाः बिचाः हे मयाःसां जिउ। बजाःभाः पूरा हे व्यापारीतय् ल्हातय् लाः वंगु दुसा सरकारं गनं हे काबुइ काये फइगु अवस्था मदयाः मुक दर्शक जक जुयाः स्वयाच्वंगु दु ।

अनं लिपा बैंकय् ध्यबाया अभाव जुयाः सर्वसाधारणयात हानं मेगु समस्या जूगु दु। नेपाःया फुक्क जनतां बैंकय् ध्यबा तयातःगु ला मदु तर बैंकय् ध्यबा मदयाः गुलिं तलब काये मखनाः, गुलिं ज्याला काये मखनाः पीडित जूगु दु। नेपाःया अर्थतन्त्र अथें नं डाँवाडोल जुयाच्वंगु दु। आः जूगु ध्यबाया अभाव शायद चौपट हे जुइत्यंगुया संकेत जुइफु। ध्यबाया मदयाः थपाय्धंगु हाहाकार जुइधुंकलं नं सरकारं धाःसा थथे गय् यानाः जुल धकाः आः तक कारण पत्ता लगे याये मफुनि। कारण पत्ता लगे यायेत आयोग तिनि गठन यात। थ्वहे इलय् अप्वःगु लुटपाट, खुँज्या व ठगीया खँ ला अलग्ग हे दनि ।

देशय् राज व राजनीति सञ्चालनया ज्या थासय् मलाःगुलिं मुलुक गतिपति मलाक न्ह्यानाच्वंगु दु। थुगुसी मोहनि हनीपिं सर्वसाधारणं उकियात बांलाक हे महसुस याये खनीगु जुल। मोहनियात दँय् छक्वः न्ह्यइपुक हनीगु नखः कथं कायेगु याः। तर थुगुसी नखःया रस हे मदयेक मोहनि हनेमाःगु बाध्यता दु। थज्याःगु इलय् झीसं सुयां भिं जुइगु आशा मयाःसां नं औपचारिक भिंतुना बीगु बाहेक मेगु छु याये फइ ?

More Stories Like this