अबुया पलाःचिं लिनाः

नेपालय् पप म्येँयात धाथें 'पपुलर' यायेगुली 'पायोनियर' भूमिका दुम्ह गायक भिम तुलाधरया म्ह्याय् नं अबुया पलाःचिं लिनाः संगीत ख्यलय् कुहां वःगु दु। तर भिमया म्ह्याय् ल्हातय् आधुनिक गितार ज्वनाः मखु परम्परागत सितार ज्वनाः वःगु खः ।

नकतिनि झिंछदँ दुम्ह मय्जु शुभेच्छा तुलाधरं सितार थानाः धुन तयार यानातःगु सीडी 'मालश्री' नकतिनि बजारय् पिहां वःगु दु। थुकियात वय्कलं मोहनिया लसताय् न्यँमितय्त बियादीगु द्यःल्हाना धाःसां जिउ। 'मालश्री' दुने मोहनिबलय् थ्वयेकीगु मालश्रीया मुक्कं निपु हे जक धुन दु। सितारं कियातःगु धुन खःसां उकियात तबला व ड्रमं बियातःगु साथ गाक्कं ज्वं ।

परम्परागत सितारय् आधुनिक ड्रम ल्वाकज्याःगुलिं जुइमाः, मालश्रीयात फ्युजन संगीत धकाः नं नां बियातःगु दु।
मालश्री अथें नं नुगलय् थीगु संगीत खः। उकिसनं नच्चाम्ह मचां थाःगु सितार जूगुलिं जुइमाः, 'मालश्री' या धुन गाक्कं नरम जू ।

शुभेच्छां सितार सयेकूगु निदँ तिनि दत। व आखः ब्वनीगु जेम्स स्कूलय् गुरु नांजाःम्ह सितारवादक तारावीर सिंह तुलाधरपाखें वं सितार सयेकूगु खः। छेँय् नं वं सितार थायेगु धाःसा मत्वःतू। वयागु थ्वहे प्रतिभायात अझ च्वन्ह्याकेगु ताः तयाः अबु भिम तुलाधरं थुगुसी मोहनिया लसताय् थ्व सीडी पिकया बिउगु खः। सीडी पिकायेगु इलय् शुभेच्छाया जाँच लानाच्वंगु जुयाच्वन, अथे खःसां छन्हुं हे रेकर्डिङ्गया ज्या सिधयेकाः सीडी तयार यात ।

ख ला शुभेच्छां मेमेगु नं धुन थानातःगु दु। लिपा लिपा व नं पिकयावं वनेगु खँ अबु भिम तुलाधरं कनादिल ।

वास्तवय् भिमं शुरुइ ला म्ह्याय्यात नं थः थें हे गायक दयेकेगु बिचाः याःगु खः। वयागु सलय् छपु म्येँ रेकर्डिङ्ग नं यायेधुंकूगु जुयाच्वन। तर हालातःगु चित्त बुझे मजुयाः पिमकाः। लिपा म्ह्याचं गायनय् उलि ध्यान नं मबिल। बरु सितारय् उत्साह क्यना हल। 'स्वये, भविष्यय् वं गुलि बांलाका यंकी।' अबु भिमं कनी ।

मालश्रीया थुगु धुन सीआरबीटी नम्बर ०१७०००२३०० पाखें मोबाइलय् नं डाउनलोड याये जिउ ।

थ्वहे झ्वलय् थुगु मालश्री सीडीया धुनय् हे भिजुयल नं तयाः भीसीडी नं पिहां वःगु दु। धुनयात ल्वय्क भिजुयल शुटिङ्ग यानाः पिकाःगु थ्व भीसीडी आःसा बजारय् सीमित प्रति जक पिहां वःगु दु ।

More Stories Like this