बैंक मचाःनिवं हे लाइन
थनिंनिसें ध्यबाया अभाव छुं भचा म्हो जुल
येँ (सन्ध्या टाइम्स)/मोहनि नखः न्ह्यः जूगु नोटया अभाव थनिंनिसें भचा साम्य जूगु दु। थौं राष्ट्र बैंकं थीथी बैंकतय्त ध्यबा काः वा धकाः सःता हःगु दु। बैंकतय्सं आः तक नं धाक्व धाक्व ध्यबा ला बिउगु मदुनि अथे खःसां चाप धाःसा म्हो जूगुलिं राहत महसुस जूगु खँ धाःगु दु ।
बैंकय् ध्यबा मदुगुलिं थौं येँया गुलिखे बैंकय् धाःसा बैंक चाले न्ह्यः हे मनूत लाइन च्वनाच्वंगु नं खने दत ।
ध्यबाया अभाव म्हो यायेत राष्ट्र बैंकं थीथी थासं ध्यबा मुंकेगु शुरु याःगु दुसा वांछ्वयेगु लागिं धकाः तयार यानातःगु पुलांगु नोट नं पित हयेगु निर्णय याःगु दु। पुलांम्ह गभर्नर तिलक रावलया हस्ताक्षर दुगु नोट थनिंनिसें पित हयेत्यंगु दु। गभर्नर हिलेसातकि राष्ट्र बैंकं रावलया हस्ताक्षर दुगु नोट गोदामय् स्वथंगु खः ।
थ्वहे झ्वलय् थौं नेपाल राष्ट्र बैंकया गभर्नर विजयनाथ भट्टराईं फुक्कं वाणिज्य बैंकया प्रमुखतय्त सःताः खँल्हाबल्हा यानादीगु दु। समस्या समाधान यायेत माःगु उपाय नालेगु बारे अन खँ जुइगु अनुमान दु ।
आखिर गन वन ले ध्यबा ?
थुगुसी देय्न्यंकं हे आकाझाकां नोट अभाव जूगु खनाः अर्थविद्त व राष्ट्र बैंक स्वयम् नं चकित जूगु दु। नोट छाय् अभाव जुल धकाः छानबिन यायेत राष्ट्र बैंकं छगू उच्चस्तरीय आयोग गठन याःगु दु ।
सूत्रतय्सं धाः कथं बजारय् नोट अभाव जूगुया थीथी कारण दु। उकी मध्ये छता कारण माओवादीया ल्हातय् लानाच्वंगु ध्यबा बजारय् मवःगुलिं नं थ्व अभाव जूगु खः। अथे हे कर्मचारी व नेतातय्सं थःपिंत घूस स्वरुप वःगु ध्यबा बैंकय् मतसे छेँय् हे तयातःगुलिं नं थ्व अभाव शुरु जूगु खः। उखे सीमा लागाय् नेपाःया व्यापारीतय्सं अप्वः ब्याज दरया लोभय् लानाः थःपिनि ध्यबा नेपाःया बैंकय् मतसे भारतीय बैंकय् तयेगु यानाच्वंगुलिं नं अभावयात तिबः बिउगु खँ धाःगु दु ।
नोट अभाव जूगुया दोष सरकारं राष्ट्र बैंकयात बिउगु दुसा राष्ट्र बैंकं धाःसा सरकारं हःगु न्हूगु नीतिं यानाः थ्व अभाव जूगु खः धकाः द्वपं बिउगु दु ।
