आः हिउपाः महसुस जुइ
सरकारय् कांग्रेस नं वइगु प्रचण्डया दावी
अन्तर्राष्ट्रिय समुदायया विश्वास कायेगु ज्याय् सरकार व्यस्त जुइमाःगुलिं जनतायात हिउपाःया महसुस जुइ कथंया ज्या याये मफयाच्वंगु खँ प्रधानमन्त्री पुष्पकमल दाहाल प्रचण्डं स्वीकार यानादीगु दु ।
थौं सुथय् नेपालगाजं येँ लिहां वये न्ह्यः माओवादी समर्थित बुद्धिजीवी व कार्यकर्तातय्त संवोधन यासें प्रम प्रचण्डं सरकारं यदि अन्तर्राष्ट्रिय समुदायया विश्वास मकासे जनतां हिउपाःया महसुस याये खनी कथंया ज्या न्ह्याकल धाःसा अन्तर्राष्ट्रिय समुदाय संशंकित जुइगु खँ कनादिसें आः सरकारं हिउपाःया महसुस जुइ कथंया ज्या न्ह्याकीगु खँ कनादिल ।
नेपाली कांग्रेसयात सरकारं पिने तयाः न्ह्याः वने मफइगु खँ कनादिसें वय्कलं कांग्रेसया सहकार्य बिना न्हूगु संविधान नं दयेके फइ मखु धयादिल ।
येँय् लिथ्यनेवं थम्हं नेपाली कांग्रेसया सभापति गिरिजाप्रसाद कोइरालायात नापलानाः कांग्रेसयात सरकारय् हयेगु बारे खँ ल्हायेगु जानकारी नं बियादिल । वय्कलं धयादिल कांग्रेस याकनं हे सरकारय् वइ ।
थौं हे प्रम प्रचण्डं कांग्रेस सभापति गिरिजाप्रसाद कोइरालायात नापलानाः खँल्हाबल्हा यायेगु धाःसां उकिया ई धाःसा क्वःमजिउनिगु खँ सीदुगु दु ।
माओवादी पार्टी दुने ब्वलनाच्वंगु विवाद सामान्य जूगु खँ कनादिसें वय्कलं इलय् ब्यलय् पार्टी दुने थज्याःगु विवाद ब्वलंसां उिकं पार्टीयात बल्लाकेगु हे ज्या याइगु दावी नं यानादिल । याकनं हे पार्टीया सुदृढीकरण यायेगु निंतिं आन्तरिक रुपं सहलह जुयाच्वंगु खँ नं वय्कलं कनादिल । वय्कलं द्वन्द्वपीडितय् निंतिं नं सरकारं राहत बीगु ज्याझ्वः हयेगु खँ धयादिल ।
सरकारं याकनं हे शान्ति समिति दयेकाः सेना समायोजन यायेगु खँ धासें वय्कलं सरकार साचालनया राजनीतिक समिति नं याकनं हे दयेकेगु खँ कनादिल । थ्वहे झ्वलय् प्रम प्रचण्डं थौं अन्तर्राष्ट्रिय दातृ निकायया प्रतिनिधित लिसे सहलह याइगु जूगु दु । लिसें प्रम प्रचण्डं कोशी व सुदूरपश्चिमया खुसिबालं पीडित प्रतिनिधित लिसे नं थौं सहलह याइगु ग्वसाः दु ।
