जलवायु परिवर्तनय् तःधंगु देय्तय् बचं

अमेरिकाय् न्ह्यानाच्वंगु जलवायु परिवर्तन सम्बन्धी छगू अन्तर्राष्ट्रिय गोष्ठीइ न्ववासें चीन व अमेरिकां थ्व समस्या समाधानया लागिं थःपिंसं ठोस पलाः न्ह्याकेगु बचं बिउगु दु। थौंकन्हय् विश्वय् दकलय् अप्वः प्रुदषण यानाः जलवायु परिवर्तनयात तिबः बियाच्वंगु निगू देय् चीन व अमेरिका हे खःसा उपिंपाखें थज्याःगु आश्वासन वःगु धाथें नं लसताया विषय खः। तर उमिसं ल्ह्वने धाःगु ठोस पलाः गज्याःगु खः, व धाःसा खुले याःगु मदुनि ।

पर्यावरण प्रदूषणय् मुख्य ल्हाः दुपिं ततःधंगु देय्तय्सं उकिं प्रभावित जुइगु चीधंगु देतय्त छुं ध्यबा बीगुयात हे थुकिया ठोस समाधान धकाः तायेकेगु यानाच्वंगु दु। वास्तवय् थ्व उकिया समाधान मखु। जलवायु परिवर्तनपाखें नेपाः थेंज्याःगु हिमाल क्यनाः पर्यटन सालेमाःगु देय्या हिमालया च्वापु नाया वनाच्वंगु दुसा माल्दिभ्स थेंज्याःगु समुद्र सतह स्वयां छुं भचा जक च्वय् लाःगु देय्या ला अस्तित्व हे तना वनीगु खः ला धइगु खतरा समेत वयाच्वंगु दु। थथे देय्या अस्तित्व हे खतराय् लानाच्वंगु थ्व घरिइ अज्याःगु देय्तय्त छुं भचा ध्यबा ज्वंकां समस्याया समाधान जुइ मखु ।

पर्यावरणीय समस्या धइगु सुनां थ्व समस्या सिर्जना याःगु खः वयागु जक समस्या मखु। थ्व ला अज्याःगु समस्या पिकायेगु ज्याय् छुं हे ल्हाः मदुगु देय्तय्गु नं समस्या खः। उकिं थुकिया धाथें हे समाधान मालेगु खःसा पर्यावरणीय समस्या पिहां वइगु ज्या हे मयायेमाः। अथवा यानाच्वनागु दुसा उकियात म्हो यायेमाः। वा, समस्या म्हो जुइगु छुं उपाय नालेमाः। तःधंगु देय्त थथे याकेगु आँट धाःसा चीधंगु देय्तय्के मदु। मू समस्या ला थ्व धकाःसा खः ।

More Stories Like this