लोकतान्त्रिक नेवाः दबू नीस्वने धुंकाः

नेपाली कांग्रेस पार्टीयात समर्थन याइपिं छपुचः नेवाःत जानाः सोमवाः 'लोकतान्त्रिक नेवाः दबू' नांगु नेवाःतय् न्हूगु संस्था चायेकूगु दु। अले उकिया नायः जुयादीम्ह खः भाजु गजेन्द्रमान मानन्धर ।

खास यानाः नेवाः आन्दोलनयात साथ बीगु ल्याखं राजनीतिक पार्टी नेपाली कांग्रेस दुने नं जातीय स्वशासनयात माने याये ला मयाये ला यानाः ठेगान मदयेकाच्वंपिं नेतातय्त खःगु थासय् हयेगु निंतिं थुगु दबू नीस्वनागु खँ नायः गजेन्द्रमान मानन्धरं कनादिल। वय्कः स्वयम् नं नेपाली कांग्रेस येँ जिल्ला समितिया छम्ह सक्रिय दुजः खः। नापं नेवाः आन्दोलनय् सक्रिय जुयाच्वनादीम्ह ब्यक्तित्व नं खः। आःयात झिंखुम्ह दुजः दुगु थुगु संस्थां निरन्तर रुपं पार्टी दुने जातीय स्वशासनय् पार्टीयात हयेत लबिङ शुरु यायेगु खँ धाःगु दु ।

कांग्रेस दुने नं जातीय राज्यया सम्भावना दनि धइगु मान्यता ज्वनाः थुगु दबूपाखें गथे गणतन्त्रय् पार्टी वनेवं धात्थें खयेक देशय् गणतन्त्र स्थापना जूगु खः, आः नेपाली कांग्रेसं जातीय स्वशासनया समर्थन यानाः न्ह्याः वन धाःसा अवश्य नं देशय् जातीय स्वशासन वइ धकाः विश्वास यानातःगु दु। थ्व ज्या याकनं हे जुइ धासें नायः मानन्धरं देशय् पृथ्वीनारायण शाहं आक्रमण याये न्ह्यः कायम जुयाच्वंगु नेपालमण्डलयात हे नेवाः राज्य कथं कायम यायेमाःगु व उगु खँ मथूपिंत ध्वाथुइके कथं थीथी ज्यात याना वनेगु थःपिनि उद्देश्य दुगु नं कनादिल ।

ऐतिहासिक प्रमाणया लिधंसाय् धायेगु खःसा जुजु नरेन्द्रदेवं तामाङतय्त नेपालमण्डल लागाय् दुकयाः स्वनिगः जःखः तयेहःगु खः। उकिं नेवाः लागा धइगु नेपाःया वर्तमान १२ जिल्ला दुने लाः धइगु नेवाःतय् दावीयात त्वःते मजिउगु वय्कःया दावी दु। 'नेपालमण्डल झीगु खः, झीगु हे कायम जुइमाः,' वय्कलं धयादी। आः तामाङतय्त नेवाः राज्यं पितिनेगु मखु कि उमित संरक्षण यायेमाः धयागु वय्कःया धापू दु ।

नेवाःतय्गु कला, संस्कृति व भाय्यात सम्वर्द्धन, संरक्षण व प्रचार यायेगु थ्व दबूया न्हापांगु उद्देश्य खः। अथेहे शाहवंशं स्वनिगलय् वये न्ह्यः नेपालमण्डल सार्वभौम सम्पन्न राष्ट्र जूगु खने दुगुलिं उगु सभ्यता अन च्वंपिं नेवाःत हे जानाः बचे यायेमाःगुलिं नं नेवाः धालकि साम्प्रदायिक खंकीपिंत ध्वाथुइकेगु उमिगु मेगु उद्देश्य लाः। नापं साम्प्रदायिक खनीपिंत दबूपाखें प्रशिक्षण कक्षा चले यानाः समृद्ध समाज स्थापना यायेगु ताः तयातःगु दु। अथे हे नेवाः कला, संस्कृति व भाय्यात नाला काइपिंत नेवाः मान्यता बियाः राई, लिम्बु, खस् ब्रम्हू हे जूसां थः याना यंकेगु दबूया अन्तिम उद्देश्य खः।
थ्वहे मान्यता कथं लोकतान्त्रिक नेवाः दबू नीस्वंगु इलय् नरहरि आचार्य, नविन्द्रराज जोशी व सुप्रभा घिमिरे आदि नेतातय्त नं सःतूगु खः। वय्कःपिनि भावना नेवाःतनाप तसकं सती। आःयात येँय् जक संगठन दुगु खःसां लिपा जिल्ला जिल्लाय् नं विस्तार याना यंकेगु लक्ष्य दुगु थुगु संस्थां याकनं हे नेपाली कांग्रेस लगायत तमाम लोकतान्त्रिक शक्तियात छथाय् हयाः देशय् जातीय स्वशासन कायम यायेगु लागिं अभियान न्ह्याकेगु तयारी यानाच्वंगु दु ।

More Stories Like this