मोहनि लिपा हे सहमति
असोज २१ न्ह्यः हे समाधान लुइकेमाः - प्रचण्ड
येँ (सन्ध्या टाइम्स)/मोहनि नखः लिपा हे देशय् ब्वलनाच्वंगु राजनीतिक गतिरोध अन्त्य जुयाः सहमतिया राजनीति न्ह्याइगु खँ एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' धयादीगु दु। वय्कलं उगु खँ थौं सुथय् मगरात राज्य समितिं पाल्पाय् ग्वसाः ग्वःगु पत्रकार सम्मेलनय् न्ववायेगु झ्वलय् धयादीगु खः ।
वइगु असोज २१ गते दुने हे राजनीतिक सहमति कायम जुइमाः धइगु थःगु बिचाः जूगु खँ कनादिसें वय्कलं तर थीथी कारणं यानाः सहमति कायम जुइ मफयाच्वंगु खँ कनादिल।
एमाले व कांग्रेसया हे कारणं सहमति जुइ मफयाच्वंगु खँ कनादिसें वय्कलं विशेष समितिइ नं थःपिंत चीकेगु कुतः जुयाच्वंगु द्वपं बियादीगु दु। तर उगु विशेष समितिया धइगु छु खः धइगु बारे धाःसा वय्कलं स्पष्ट यानामदी ।
उगु पत्रकार सम्मेलनय् न्ववायेगु झ्वलय् अध्यक्ष प्रचण्डं प्रधानमन्त्री माधव नेपाल राष्ट्रपतियात बिन्तिपत्र तयाः प्रधानमन्त्री जूगु द्वपं नं बियादिल ।
'शाही कालय् जुजुयात बिन्तिपत्र तयाः प्रधानमन्त्री जुइत याःगु कुतः असफल जूगुलिं आः राष्ट्रपतियात बिन्तिपत्र तःगु' द्वपं नं वय्कलं बियादिल। उगु पत्रकार सम्मेलनय् न्ववायेगु झ्वलय् वय्कलं बूपिंसं हे सरकार दयेकेगु खःसा चुनावया छु अर्थ धयादिसें एमाले व कांग्रेसया सभासद्त हे वर्तमान सरकारलिसे असन्तुष्ट जुयाच्वंगुलिं थ्व अल्पमतया सरकार जूगु दाबी नं वय्कलं यानादीगु दु ।
राष्ट्रपतिं नागरिक सर्वोच्चता स्वयां पिहां वनाः निर्णय याःवंगुलिं थम्हं राजीनामा बियागु खँ कनादिसें पुलांपिं नेतातय् मानसिकता पुलांगु हे जूगुलिं समस्या खनेदुगु खँ नं वय्कलं कनादिसें जनतां आः न्हूगु अपेक्षा यानाच्वंगुलि जनतां उमित लिना छ्वइगु खँ नं कनादिल ।
माओवादीयात जनतां अप्वः मत बियाः ज्या यायेत व कांग्रेस व एमालेयात माओवादीया लिउलिउ वनेत मत बिउगु खःसां नं ध्यबाया कासाय् सभासद्त लगे जूगुलिं बूपिनि नेतृत्वय् सरकार वंगु द्वपं नं वय्कलं बियादिल। म्हिगः पाल्पाय् थ्यंम्ह अध्यक्ष प्रचण्डं थीथी लागा चाःहिउगु खः ।
