नखः न्ह्यः जुयाच्वंगु नोटया अभाव
मोहनि नखः न्ह्यःने वयाच्वंगु इलय् राष्ट्र बैंकं पर्याप्त मात्राय् ध्यबा पित बी मफयेवं आम नेपाःमिपिंत नखः हनेत तकं थाकुगु महसुस थन जुयाच्वंगु दु। राष्ट्र बैंकं इलय् ध्यबा छ्वया महःगुलिं यानाः सरकारी बैंकया लिसें निजी क्षेत्रया बैंकं तकं थःपिंत माःगु इलय् थःगु निक्षेप लिकाये मफइगु अवस्था वइगु धइगु थ्व सरकारया तःधंगु कमजोरी खः।
खतुं नेपालय् ध्यबाया अभाव जुइ धकाः वंगु दत्या न्ह्यवंनिसें हे बजारय् हल्ला जुयाच्वंगु खः तर अथे खःसां नं सरकारं ध्यबाया व्यवस्थापन इलय् याये मफयेवं थौं थ्व समस्यां विकराल रुप काःगु खः धइगु खँय् आपालं मनूत सहमत दु। राष्ट्र बैंकया थ्व प्रकरण छगू कथं सरकारी क्षेत्रय् जुयाच्वंगु ढिलासुस्तीया दकलय् तःधंगु दसु नं खः ।
गुलिखे कर्मचारीतय्सं बैंकं ध्यबा मबिउगुलिं थःपिसं तलब तकं काये मखं धकाः सतक तकं बन्द यायेमाःगु अवस्था वलसा मेखे बैंकय् ध्यबा कायेत वःपिं ग्राहकतय्त ध्यबा बी मफयाः स्वयम बैंकया कर्मचारीतय्सं तकं नं बैंकय् तालं ग्वयेमाःगु अवस्था वःगु दु। थ्व आर्थिक अराजकताया पराकाष्ठा खः ।
थ्वहे झ्वलय् सरकारं नेपाली ध्यबाया अभाव जुइवं थीथी बैंकयात आः थत्थेंयात जक जूसां भारतीय नोट बीगु निर्णय याःगु दु ।
खतुं विदेशी ध्यबा थुकथं सर्वसाधारण जनतां छ्यलेगु धइगु नं छगू कथंया आर्थिक अराजकता खः। तर सरकार स्वयम हे बाध्य जुयाः आः विदेशी ध्यबा छ्ययेकेमाःगु अवस्था वःगु दु, गुगु कि सरकारी स्वीकृति मदयेकं सर्वसाधारण जनतां छ्यलेत सरकारं हे बन्देज तयातःगु दु। थुकियात हे हाचां गायेत सरकार बाध्य जूगु दु। सरकारया थ्व आर्थिक अराजकतायात आः गुकथं कायेगु धइगु न्ह्यसः ब्वलंगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
