धाथें हे भाषाया थुवाः रमापतिराज

ख्वपया खौमा त्वालय् थौं स्वयां चय्दँ न्ह्यः बूम्ह रमापतिराज शर्मा थौं तक नं नेपालभाषा सेवा धायेवं फु मफु हे मधासे थीथी थासय् थ्यंकाच्वंगु दु। विक्रम संवत १९८६ फागुन कृष्ण पञ्चमी कुन्हु अबु रिपुभंजनराज राजोपाध्याय व मां पिनाकीप्रियबल्लभादेवी राजोपाध्यायया काय कथं बूम्ह वय्कः थःगु जिवंकाःछि हे नेपालभाषा, नेपालभाषा ब्याकरण व नेपालभाषाया थीथी भाषाविज्ञान क्षेत्रय् मालेकुले ज्याय् हे थःत पानाच्वनादिल। आः तक नं वय्कःया उगु यात्रा जारी हे दनि। 'जिगु म्ये', 'नेवाः भाय् खँया हलिमलि' नापं 'नेपालभाषाया बँ नेपालभाषाया नँ' नांगु अनुसन्धान एवं आधारभूत शब्द व भाषा विज्ञान सम्बन्धी सफू पिथनाः थःगु भाषा विज्ञानया म्हसीका बियादीम्ह वय्कलं कडा न्ववानादी, तर गुलि नं न्ववानादी ज्या वःगु व भाषिक रुपं बोध यायेगु खँ हे न्ववानादी ।

वय्कः वंशानुगत रुपं राजोपाध्याय ब्रम्हू खः। साहित्य च्वयेगुली तसकं रुची तयादीम्ह वयकलं थः दाजु गिरिन्द्रराज राजोपाध्यायपाखें छेँय् हे च्वनाः संस्कृत ब्याकरण कौमुदी व पुराण ब्वनादीगु जुयाच्वन। २००९ सालंनिसें वय्कलं कविता च्वयेगु शुरु यानादिल। २०१० सालं नीस्वंगु नेपाल साहित्य मन्दिरया वय्कः संस्थापक दुजः नं खः। थः पासापिं सूर्यबहादुर पिवाः, तेजेश्वरबाबु ग्वंगः व तिलकप्रकाश कायस्थ नापं वय्कः थुगु आन्दोलनय् सहभागी जुयादिल। विदेशी पासापिं ब्वाईड माइको लवस्की, रबर लेभी, अंकस्टल व स्टिभयात वय्कलं नेपालभाषाया भाषाविज्ञान, शब्द विज्ञान व शब्दया ब्यूत्पत्ति बारे स्यनादीगु खः ।

वय्कःयात नेपालभाषाया पुलांगु संस्था च्वसापासापाखें भाषाजवाः व नेपालभाषा परिषद्पाखें भाषाथुवाया उपाधि बियातःगु दु। कविकेशरी चित्तधर 'हृदयं' नं वय्कःयात छम्ह उदियमान कवि धकाः च्वछानादीगु खः। वय्कलं थःगु अमूल्य कृतिया लागिं नेपालभाषाया नांजाःगु श्रेष्ठ सिरपाः नं त्याकादीगु दु। थौंकन्हय् वय्कः भाषाविज्ञान व शब्दविज्ञानय् अद्वितीय अनुसन्धान अन्वेषक व भाषाशास्त्रीया रुपय् म्हसिउ। अथेहे वय्कलं संस्कृत व संस्कार विषयया खोजपूर्ण रचनात नं च्वयादीगु दु। भाषा ब्याकरणय् नं बैज्ञानिक सूत्रत बियाः आधारभूत रचनात च्वयाच्वनादीगु दु। वयकःया अनुसन्धान व रचनां गबलें गबलें वय्कःयात ब्याकरणविद् व भाषाविद्तय् दथुइ तःधंगु हलचल यानाबी। वय्कःया आपालं भाषा, साहित्य व शब्दविज्ञानया च्वसुत दु। भावी पुस्ताया लागिं नं तसकं उपयोगी ग्रन्थ कथं छ्यले जिउगु वय्कःयाके सामग्री तयार दु ।

वैदिक प्रतिष्ठान, विराट नेपालभाषा साहित्य सम्मेलन गुथि, नेकपा (एमाले) आदि संघसंस्था व खलः पुचःतय्सं हनेज्या यानातःम्ह भाषा बैज्ञानिक रमापतिराज शर्मायात थुगुसी तिनि ख्वपया भक्तपुर साहित्यिक समाजपाखें दोसल्लां न्ययेकाः हनापौ देछासें हनेज्या याःगु खः ।

भाषा ख्यलय् साहित्य सिर्जना याइपिं ला यक्व दु तर भाषा विज्ञानया अध्ययन याइपिं धाःसा तसकं म्हो जक दु। वय्कः अथे म्होचा जक दुपिं झी भाषाशास्त्रीत मध्ये छम्ह खः। वय्कलं थःत उकी हे पानाः धाथें हे भाषायात बचे यायेगु थुवाःया भूमिका म्हितादीगु दु। नेपालभाषाया ब्याकरणिक अध्ययनय् वय्कः नं विशिष्ट स्थान दु ।

More Stories Like this